ونەركاسىپتە روبوتتاردى قولدانۋدى ارتتىرۋ كەرەك - اسقار مامين
«روبوتتاردىڭ ورتاشا دەڭگەيى 10 مىڭ جۇمىسشىعا شامامەن 70 روبوتتى قۇرايدى. وكىنىشكە وراي، ءبىز سالامىزدا ەكى ءماندى سانعا دا ءالى جەتكەن جوقپىز. مەن وڭتۇستىك كورەيا، جاپونيا، سينگاپۋر سىندى 10 مىڭ جۇمىسشىعا 500-دەن استام روبوت كەلەتىن دامىعان ەلدەردى ايتىپ تا وتىرعانىم جوق. ءبىزدىڭ ۇمتىلۋعا ءتيىستى باعىتىمىز بار. ونسىز جاھاندىق باسەكەگە قابىلەتتى بولۋ مۇمكىن ەمەس. مۇنى بارلىعى ايقىن ءتۇسىنۋى قاجەت»، - دەدى اسقار مامين.
سونىمەن قاتار ول ونەركاسىپتە جاساندى ينتەللەكت، 3d- پرينتينگ، روبوتتاندىرۋ، سيفرلاندىرۋ سىندى جاڭا تەحنولوگيالاردى ەنگىزۋ قاجەتتىگىنە نازار اۋداردى.
ايتا كەتەرلىگى، وسى جيىندا ق ر ينۆەستيتسيالار جانە دامۋ ءمينيسترى جەڭىس قاسىمبەك ەلىمىزدىڭ ماشينا جاساۋ سالاسى دامۋىنىڭ 8 ايلىق قورىتىندىسىن شىعارعان بولاتىن. «8 ايدىڭ قورىتىندىسىندا وسىعان دەيىنگى جىلداردى قوسا العاندا شىعارىلعان ماشينا جاساۋ ونىمدەرىنەن ارتىق ءونىمدى ەكسپورتقا جونەلتتىك. نەگىزىنەن ولار بەلارۋس، تاجىكستان، رەسەي جانە قىتاي نارىقتارى. ماشينا جاساۋ سەكتورىنىڭ جالپى قۇنى 90 ميلليارد تەڭگەدەن استى. بۇل وتكەن جىلدىڭ سايكەس كەزەڭىمەن سالىستىرعاندا 4 ەسەگە ارتىق»، - دەگەن ەدى ول.
اۆتور: مارلان جيەمباي