زەينوللا ساماشيەۆ: كونەنىڭ جۇمباعى بەرەلدىڭ قويناۋىندا
بۇل تۋرالى ق ر مادەنيەت جانە سپورت مينيسترلىگىنىڭ جانىنداعى «قاسيەتتى قازاقستان» عىلىمي- زەرتتەۋ ورتالىعىنان حابارلادى.
ەسكە سالا كەتسەك، بۇگىن «قاسيەتتى قازاقستان» عىلىمي- زەرتتەۋ ورتالىعىنىڭ جەتەكشىسى بەرىك ءابدىعالي «رۋحاني جاڭعىرۋ» باعدارلاماسىن جۇزەگە اسىرۋ ماقساتىندا قازاقستاننىڭ كيەلى جەرلەرىن انىقتاۋ جۇمىسى جۇرگىزىلىپ جاتقانىن مالىمدەگەن بولاتىن. بۇگىنگى كۇنگە دەيىن ەلىمىزدە جالپى ۇلتتىق دەڭگەيدەگى 100 جانە جەرگىلىكتى ماڭىزى بار 500 كيەلى ورىن تاڭدالىپ الىنىپ، ولار ارنايى ءتىزىم جوباسىنا ەنگىزىلگەن. قاسيەتتى ورىنداردىڭ ءتىزىمىنىڭ ىشىندە شىعىس قازاقستان وبلىسى قاتونقاراعاي اۋدانىنداعى بەرەل قورىمى دا ەنىپ وتىر.
تاريح عىلىمدارىنىڭ دوكتورى، پروفەسسور زەينوللا ساماشيەۆتىڭ ايتۋىنشا، بەرەلدىڭ زەرتتەلىپ جاتقانىنا 19 جىلداي ۋاقىت بولىپ قالعان. «بەرەل ءبىزدىڭ زامانىمىزعا دەيىنگى 4 - عاسىر كەزەڭىن قامتىپ، سول كەزەڭدەگى اتا- بابالارىمىزدىڭ تاريحى، مادەنيەتى تۋرالى دەرەكتەردەن اقپارات بەرەتىن بىردەن- ءبىر ەسكەرتكىش بولىپ تابىلادى. ءبىزدىڭ اتا- بابالارىمىز قالاي ءومىر ءسۇردى، كورشىلەرىمەن قانداي قارىم- قاتىناس جاسادى، قانداي ەكونوميكالىق بايلانىس ورناتتى؟ سونداي سۇراقتاردىڭ جاۋابىن شەشۋدە بەرەل وتە قۇندى ەسكەرتكىش. كونە ونەر تۇرعىسىنان الىپ قاراعاندا بەرەلدەن تابىلىپ جاتقان قۇندىلىقتاردىڭ ءبىزدىڭ قازىرگى زاماننىڭ تاريحى ءۇشىن ماڭىزى وتە زور. سونداعى كونە ونەردىڭ وبرازدارى، ولاردىڭ قازاق ونەرىمەنەن تاريحي ساباقتاستىعى بار. سونىمەن بىرگە، كونە زامان قۇندىلىقتارىن قازىرگى مادەني كەڭىستىككە ينتەگراتسيالاۋ ماسەلەسى جولعا دۇرىس قويىلىپ كەلە جاتىر. وسى رەتتە بەرەل قورىمىنىڭ كورسەتەرى بار. بەرەل مۋزەيى اشىلدى. وسى مۋزەيمەن ءبىز اۋقىمدى مادەنيەتىمىزدىڭ ءتۇپنۇسقالارىن دارىپتەپ، كورسەتە الامىز»، - دەيدى زەينوللا ساماشيەۆ.
اۆتور: ايان بەكەن ۇلى