گرۋزيادا جيرەن ءتۇستى ادامداردىڭ حالىقارالىق مەرەكەسى ءوتتى

استانا. قازاقپارات - تبيليسيدە كۇرەڭ كۇزدىڭ تاعى ءبىر جارقىن مەيرامى اتالىپ ءوتتى. شيكىل سارى ادامداردىڭ حالىقارالىق مەرەكەسى وسىمەن التىنشى مارتە وتكىزىلىپ وتىر.

 جالپى، گرۋزيادا جيرەن ءتۇستى جاندار از ەمەس ەكەن. الەمدە قاراتورى، اقشىل ادامداردان وزگە كەلبەتى اشىق ءتۇستى جاندار بار. ولار كوپ ادامنىڭ اراسىنان بىردەن كوزگە تۇسەدى. الەم بويىنشا 3 پايىز ادامنىڭ سانى وسى توپقا جاتقىزىلعان.

بۇگىن گرۋزيادا اشىق- جارقىن، بولمىسىنان تارتىمدى، جيرەن ءتۇستى ادامداردىڭ كۇنىن اتاپ وتۋدە. جالىن تۇستەس قىزعىلت شاش پەن كەلبەتىن سەكپىل كومكەرگەن جيرەن ءتۇستى ادامدار ورتالىق ساياباقتا باس قوستى. ولار شاشتارىنىڭ ءتۇسىن عانا ەمەس، وزدەرىن دە ەرەكشە، قايتالانباس جاندارمىز دەپ سانايدى.

سوفيا دولەجاۆا، مەرەكەگە قاتىسۋشى:

- مەنىڭ بەت- الپەتىم وزىمە ۇنايدى. جيرەن ءتۇستى ەكەنىمدى ماقتان تۇتامىن. ءبىز باسقا ادامداردان وزگەشەمىز. ەرەكشەمىز.

جيرەن ءتۇستى ادامداردىڭ مەرەكەسى جىل سايىن قىركۇيەك ايىندا اتالىپ وتەدى. بۇل كۇنى ولار باس قوسىپ، ءبىر- بىرىنە كوتەرىڭكى كوڭىل- كۇي سىيلاپ، فوتوسەسسيالار مەن بايقاۋلارعا قاتىسادى.

 نيا لونگۋراشۆيلي، ۇيىمداستىرۋشى:

 - كەلبەتىمىز كۇز مەزگىلىنە ۇقساس بولعاندىقتان، مەرەكەنى كۇزدە اتاپ ءوتۋ داستۇرگە اينالعان. ءوز مەرەكەمىزدە ءبىر- بىرىمىزگە قۋانىش پەن جاقسى كوڭىل- كۇي تارتۋ ەتەمىز.

جيرەن ءتۇستى ادامدار شىنىمەن دە جىگەرلى، ەموتسياعا بەرىلگىش، پوزيتيۆتى بولىپ كەلەدى. گرۋزيا استاناسىندا وسىمەن التىنشى مارتە ۇيىمداستىرىلعان مەرەكە جىل سايىن جوعارى دەڭگەيدە اتالىپ وتەدى.

www.24.kz