مەكتەپ باعدارلاماسىنا تاعى ءبىر ءپان ەنگىزىلەدى
ق ر ءبىلىم جانە عىلىم ۆيتسە- ءمينيسترى بيبىگۇل اسىلوۆانىڭ ايتۋىنشا، جاڭا ءپاندى ەنگىزۋگە دايىندىق جۇمىستارى ەكى جىل بۇرىن باستالعان بولاتىن. وسى ۋاقىتتىڭ ىشىندە بىرلەسكەن شارالار جوسپارى مەن ارنايى وقۋ باعدارلاماسى ازىرلەندى.
«اتالعان ءپاندى كەلەسى جىلدان باستاپ بارلىق مەكتەپتەردە ەنگىزۋ تۋرالى شەشىم قابىلداندى. وعان 2 ساعات ۋاقىت بولىنەدى. الايدا وقۋشىلار ول ءپاندى مەڭگەرە مە، جوق پا، ونى وزدەرى شەشەدى. 10-11- سىنىپ وقۋشىلارى كاسىپكەرلىكتىڭ العاشقى نەگىزدەرىن يگەرە الادى. ءسويتىپ، نارىقتىق زامانعا قاجەتتى قارىم- قابىلەتتەردى قالىپتاستىرۋ جۇمىسى مەكتەپتەن باستاپ قولعا الىنادى»، - دەدى اسىلوۆا بۇگىن استانادا وتكەن باسپا ءسوز ءماسليحاتىندا.
قازىرگى جوسپارعا سايكەس، جاڭا وقۋ جىلىنا دەيىن بارلىق مۇعالىمدەر قايتا دايارلاۋ كۋرستارىنان وتەدى. وعان دەيىن «كاسىپكەرلىك جانە بيزنەس نەگىزدەرى» اتتى وقۋلىق تا باسىلىپ شىعادى.
«اتامەكەن» ۇلتتىق كاسىپكەرلەر پالاتاسى باسقارما ءتوراعاسىنىڭ ورىنباسارى ەلدار جۇماعازيەۆتىڭ ويىنشا، جاڭا وقۋلىقتىڭ ەلەكتروندى نۇسقاسى دا بولۋى شارت. سەبەبى قازىرگى جاستار عالامتوردا ءجيى وتىرادى. وعان قوسا، بيزنەستىڭ باسىمدىقتارى زامان تالابىنا ساي وزگەرىپ تۇرادى. وسىعان بايلانىستى جاڭا ءپاننىڭ باعدارلاماسىن ۇنەمى جاڭارتىپ وتىرۋ قاجەت.
«ءبىزدىڭ ەسەبىمىزگە سايكەس، ەكى جىلدىڭ ىشىندە 68 ساباقتى مەڭگەرىپ شىعۋ قاجەت. بالكىم، ءبىر ساباققا تانىمال ءبىر بيزنەسمەن جاۋاپ بەرەدى. ونداي ادامدار ءوز تاجىريبەسىمەن ءبولىسىپ، كاسىپكەرلىكتى جۇرگىزۋدىڭ قىر- سىرىن اشىپ بەرسە ەكەن دەيمىز. مەكتەپتى بىتىرگەندە ءاربىر وقۋشى ءبىر- ءبىر بيزنەس جوبانى ۇسىنادى. كىم بىلەدى، سونىڭ ىشىندە ۇزدىك ستارتاپتار بولاتىن شىعار»، - دەيدى جۇماعازيەۆ.
اۆتور: ارمان اسقاروۆ