ۇكىمەتتە قازاقستان شاھارلارىن «اقىلدى قالا» ساناتىنا قوسۋ تاپسىرىلدى

استانا. قازاقپارات - ق ر پرەمەر- ءمينيسترى باقىتجان ساعىنتايەۆ قازاقستاننىڭ بارلىق وبلىس ورتالىقتارىن «اقىلدى قالا» ەتىپ جاساۋدى تاپسىردى، دەپ حابارلايدى قازاقپارات.

وسى ورايدا ۇكىمەت باسشىسى استانا، الماتى، شىمكەنت جانە اقتوبە شاھارلارىنداعى «smart city» جوبالارىن ۇلگى ەتىپ كورسەتتى.

«ق ر اقپارات جانە كوممۋنيكاتسيالار مينيسترلىگىنە بارلىق وبلىس ورتالىقتارىنا ەنگىزۋگە بولاتىن «اقىلدى قالالار» ۇلگىلىك تۇجىرىمداماسىن قۇرۋدى تاپسىرامىن»، - دەدى پرەمەر- مينيستر ۇكىمەت وتىرىسىندا.

 سونىمەن قاتار ساعىنتايەۆ جاۋاپتى مينيسترلىكتەرگە جاڭا تەحنولوگيالاردى پايدالانۋدى ىنتالاندىرۋ، يننوۆاتسيالىق شەشىمدەردى ازىرلەۋ، ستارتاپ- ورتانى دامىتۋ ءۇشىن زاڭناماعا وزگەرىستەر بويىنشا ۇسىنىستار ەنگىزۋدى جۇكتەدى.

مۇنىمەن قوسا، ۇكىمەت باسشىسى ادامي كاپيتالدى دامىتۋ ماسەلەسىنە توقتالا كەلە، بۇل تۇرعىدا ءبىلىم جانە عىلىم مينيسترلىگىنە ەكى اپتالىق مەرزىمدە ۇسىنىستار ەنگىزۋدى تاپسىردى.

ءسوز سوڭىندا پرەمەر- مينيستر قاراشانىڭ سوڭىنا دەيىن «سيفرلىق قازاقستان» باعدارلاماسى جوباسىنىڭ پىسىقتالعان نۇسقاسىن اياقتاۋ كەرەكتىگىن جانە ونى ۇكىمەت وتىرىسىنا ەنگىزۋ قاجەتتىگىن قاداپ ايتتى.

 ەستەرىڭىزگە سالا كەتەيىك، وتكەن اپتادا استانادا سيفرلاندىرۋ ماسەلەسىنە ارنالعان رەسپۋبليكالىق كەڭەستە ەلباسى نۇرسۇلتان نازاربايەۆ قازاقستانعا مول تابىس اكەلەتىن ستارتاپتاردى قۇرىپ، ولاردى ىسكە قوسۋدى تاپسىردى.

 سونىمەن قاتار ق ر پرەزيدەنتى جانىنان سيفرلاندىرۋ جونىندەگى كوميسسيا قۇرىلادى.

اۆتور: رۋسلان عابباسوۆ