مەملەكەتىمىزدىڭ تۇراقتىلىعى ەل دامۋىنىڭ نەگىزگى فاكتورى - نۇرسۇلتان نازاربايەۆ

تاراز. قازاقپارات - مەملەكەت باسشىسى نۇرسۇلتان نازاربايەۆتىڭ جامبىل وبلىسىنا جاساعان ساپارى ءوڭىردىڭ جۇرتشىلىق وكىلدەرىمەن كەزدەسۋىمەن اياقتالدى، دەپ حابارلايدى قازاقپارات ءتىلشىسى.

«اراي- پلازا» بيزنەس- ورتالىعىندا وتكەن ەلباسىمەن بولعان كەزدەسۋگە جامبىل وبلىسىنداعى ەڭبەك سىڭىرگەن ارداگەرلەر، شىعارماشىل زيالى قاۋىم وكىلدەرى، ءبىلىم جانە عىلىم سالاسىنىڭ قىزمەتكەرلەرى، ونەركاسىپتىك كاسىپورىندارىنىڭ جۇمىسشىلارى، ستۋدەنت جاستار، كاسىپكەرلەر، قوعامدىق ۇيىمدار مەن ەتنومادەني بىرلەستىكتەردىڭ جەتەكشىلەرى قاتىستى.

جيىندا قازاقستان پرەزيدەنتى ءوڭىردىڭ حيميا ونەركاسىبىن دامىتۋ سالاسىنداعى الەۋەتى زور ەكەنىن ايتىپ، يندۋستريالىق جانە ينفراقۇرىلىمدىق باعدارلامالاردى ءتيىمدى ىسكە اسىرۋدىڭ ماڭىزدىلىعىنا توقتالدى.

«حيميا سالاسى وبلىستىڭ بۇكىل ونەركاسىپ ءوندىرىسىنىڭ 20 پايىزدان استامىن قۇرايدى. يندۋستريالاندىرۋ باعدارلاماسى ارقىلى وڭىردە 53 جوبا ىسكە اسىرىلدى. وسى ماقساتپەن 158 ميلليارد تەڭگە كولەمىندە ينۆەستيتسيا تارتىلىپ، 7 مىڭعا جۋىق جۇمىس ورنى اشىلدى. «باتىس ەۋروپا - باتىس قىتاي» حالىقارالىق اۆتوجولى سالىندى. قاراتاۋ مەن جاڭاتاس قالالارىنا ەداۋىر قولداۋ كورسەتىلدى. جالپى، جۇزەگە اسىرىلىپ جاتقان بارلىق باعدارلامالار حالىقتىڭ ءال- اۋقاتىن ارتتىرۋعا باعىتتالعان، - دەدى نۇرسۇلتان نازاربايەۆ.

قازاقستان پرەزيدەنتى حالقىمىزدىڭ بىرلىگى مەن مەملەكەتىمىزدىڭ تۇراقتىلىعى ەل دامۋىنىڭ نەگىزگى فاكتورى بولىپ سانالاتىنىن ايتتى.

«مۇنىڭ ءبارى - بارشا قازاقستاندىقتار بىرلىگىنىڭ، كەلىسىمى مەن دوستىعىنىڭ، قوعامداعى تۇراقتىلىقتىڭ ناتيجەسى. ءبىزدىڭ بىتىمگەر مەملەكەت اتانعانىمىز بەكەر ەمەس. سيريادا دامۋ جوق. 600 مىڭ ادام بوسىپ كەتتى؟ وعان كىم كىنالى؟ سوندىقتان دا مەن ۇنەمى تۇراقتىلىق، تىنىشتىق بولعان جەردە عانا دامۋ بولادى دەپ ايتامىن. وسى تۇراقتىلىقتىڭ ارقاسىندا بىزدەگى بارلىق ەتنوس وكىلدەرى تاتۋ- ءتاتتى ءومىر ءسۇرىپ جاتىر. سول ءۇشىن ءبىزدى كوپشىلىگى باعالايدى، قۇرمەتتەيدى»، - دەدى ەلباسى.

سونداي- اق، ەلباسى وڭىردە شەشىمىن تاپپاي تۇرعان ءبىرقاتار ماسەلەلەرگە، اتاپ ايتقاندا وبلىستىڭ ونەركاسىپتىك الەۋەتى دە تولىقتاي اشىلماعاندىعىنا جانە ءونىمدى جۇمىسپەن قامتۋ ماسەلەسىنىڭ شەشىلمەي وتىرعانىنا نازار اۋداردى.

«ءوڭىردىڭ الەۋمەتتىك دامۋ كورسەتكىشتەرى تومەن. جالپى، وبلىستىڭ ونەركاسىپتىك الەۋەتى دە تولىقتاي اشىلماي وتىر. «جىبەك جولى» ەكونوميكالىق بەلدەۋىن دامىتۋ بارىسىندا 5 جوبانى ىسكە اسىرۋ كوزدەلگەن. ءبىراق بۇگىنگى كۇنگە دەيىن ءبىر دە ءبىر جوبا ىسكە قوسىلماعان»، - دەپ ءتۇيدى قازاقستان پرەزيدەنتى.