قالاي ۇيىقتاعان پايدالى؟

استانا. قازاقپارات - قانداي جاتىپ ۇيىقتاعان پايدالى؟ ارقاڭىز اۋىرىپ، دەنەڭىز قارىسىپ قالا بەرە مە؟ كوزىڭىز ءىسۋىن قويار ەمەس. باسقاشا جاتىسپەن ۇيىقتاپ كورىڭىز. سەبەبى، دۇرىس جاتپاساڭىز، سىرتقى كەلبەتىڭىزگە اسەر بەرىپ، جايسىز سەزىندىرەدى.

قىتاي مەديتسيناسىندا ادامنىڭ ءبىر قىرىنان جاتىپ ۇيىقتاعانىنىڭ پايداسى زور ەكەندىگى ايتىلادى. سول جاق قىرىنان جاتۋ اسقورىتۋ ۇدەرىسىن جاقسارتا تۇسسە، وڭ جاق قىرىمەن جاتۋ جۇيكە جۇيەسىن بوساڭسىتسا كەرەك. كەيدە «ەتبەتىڭنەن جاتپا، بەتىڭدى جوعارى قاراتىپ ۇيىقتاما» دەگەندەردى دە ءجيى ەستىپ جاتامىز. ءبىراق، بۇگىندە ماماندار بۇل پىكىرمەن كەلىسپەيدى.

 مامانداردىڭ ايتۋى بويىنشا، شالقاسىنان جاتۋدىڭ پايداسى ايتارلىقتاي. مويىن مەن بەل ەركىن جاتىپ، ال اياق پەن قول دەمالىپ قالادى. جانە دە ول جۇرەك تامىرلارىن، تىنىس الۋ جۇيەسىن، اسقورىتۋدى دۇرىستايدى ەكەن. ال قان قىسىمى جوعارى ادامدارعا جاستىقتى بيىك قويىپ، شالقاسىنان جاتىپ ۇيىقتاۋدىڭ كومەگى تيەدى.. سونىمەن قاتار، شالقاسىنان جاتۋ جاس كورىنۋدە دە ۇلكەن رولگە يە. ولاي دەگەنىمىز، شالقادان جاتىپ ۇيىقتاعان ادامنىڭ بەتتەگى بۇلشىق ەتتەرى بوساڭسىپ، تەرىسى جازىلادى. ال ەتبەتىنەن جاتساڭىز، بەتكە تەز ءاجىم ءتۇسۋى مۇمكىن. دەسە دە، ەتبەتىنەن جاتقاندا ومىرتقا ارالىعىنداعى شەمىرشەك بوساڭسيدى. بۇلاي جاتۋ تەك قارنى اش كەزدە عانا پايدالى. تويىپ تاماق جەپ بولعان سوڭ ەتبەتىنەن ۇيىقتاۋ گاستريتكە ۇشىراتادى.

قىرىنان جاتقان ادام قورىلدامايدى ەكەن. سول جاق قىرىمەن ۇيىقتاۋ وكپەسى اۋىراتىندار ءۇشىن پايدالى. اسقازانى اۋىراتىندار دا سول جاقپەن ۇيىقتاعانى دۇرىس، سەبەبى، وسىلايشا قىزىل وڭەشكە اعىپ كىرەتىن قىشقىل ءسولىن ازايتۋعا بولادى. ال سوزىلمالى سوقىر ىشەك قابىنۋ اۋىرۋى بارلار وڭ قىرىمەن جاتۋى كەرەك. جانە وڭ جاق قىرىمەن جاتقاندا ۇيىقتاعاندا جۇرەككە تۇسەتىن قىسىم جەڭىلدەيدى.

ودان بولەك، وسىلاي جاتقان كەزدە اعزا مۇشەلەرىنىڭ ءبارى بوساڭسيدى. ال ءسىز قالاي جاتاسىز؟

دەرەككوز: anabol.kz