22:15, 18 - قىركۇيەك 2017 | GMT +6
تۇركيادا سوتتى بولعان رەسەيلىك ارۋ چەمودانعا جاسىرىنىپ، شەكارا اسپاق بولعان
استانا. قازاقپارات- تۇركيادا كەمەر قالاسىندا جاياۋ جۇرگىنشىلەردى قاعىپ كەتىپ، سوتتى بولعان 27 جاسار رەسەيلىك ارۋ انگەلينا سامۋسەنكو چەمودانعا جاسىرىنىپ، گرۋزياعا شەكارا اسپاق بولعان. ونىڭ بۇل ويىن ىسكە اسىرۋعا 47 جاسار گرۋزيا ازاماتى دومەنتي سۋرمانيدزە كومەكتەسپەك بولعان.
YouTube جەلىسىندە جاريالانعان ۆيدەودا گرۋزيا ازاماتى باقىلاۋ- تەكسەرۋ بەكەتىنەن ۇلكەن چەموداندى الىپ وتپەك بولعان ءساتى بەينەلەنگەن، دەپ حابارلايدى Haber61.
وقيعا تۇركيا مەن گرۋزيا شەكاراسىندا ورنالاسقان سارپ باقىلاۋ- تەكسەرۋ بەكەتىندە ورىن العان. ۇلكەن چەموداندى الىپ ءوتۋ بارىسىندا ونى يەگەرە الماعان گرۋزين ازاماتى گرۋزين شەكاراشىلارىنىڭ كۇدىگىنە ىلىنگەن. تەكسەرۋ بارىسىندا چەمودان ىشىندە انگەلينا سامۋسەنكو جاسىرىنىپ جاتقانى انىقتالعان. شەكاراشىلاردىڭ قىراعىلىعىنىڭ ارقاسىندا «ءتىرى جۇك» تاسىمالداعان كۇدىكتى ۇستالىپ، زاڭ بۇزۋشىلار جەرگىلىكتى كونترابانداعا قارسى كۇرەس باسقارماسىنا تابىستالعان.