استانا مارافونىندا كەنيالىقتار توپ جاردى - فوتو
مارافونعا 4,5 مىڭنان استام ادام قاتىستى. ولاردىڭ اراسىندا مەملەكەتتىك ورگانداردىڭ باسشىلارى، مۇمكىندىگى شەكتەۋلى ادامدار، سونداي- اق 19 ەلدىڭ (ا ق ش ، ۇلى بريتانيا، اۆستراليا، گەرمانيا، يتاليا، كيپر، قىتاي، رەسەي جانە ت. ب. ) ازاماتتارى بار. مارافوندا ەڭ جاس قاتىسۋشى 16 جاستا، ال ەڭ جاسى ۇلكەن سپورتشى 80-دە.
ۇيىمداستىرۋشىلار سپورتتىق شارا جەڭىمپازدارىن ماراپاتتاۋ ءراسىمىن گولوۆكين-الۆارەس جەكپە- جەگىن تاماشالاعاننان كەيىن وتكىزۋدى ۇسىندى.
سونىمەن، ەلورداداعى مارافوننىڭ ناتيجەسى بويىنشا، 42,2 شاقىرىمدىق جارىستا ءبىرىنشى ورىن كەنيالىق سايمونۋ كيپرۋگۋت كيرۋيگە (Simon Kiprugut Kirui) ، 2- ورىن تاعى ءبىر كەنيالىق گەنري كيپسانگۋگە (Henry Kipsang) بۇيىردى، ال 3- ورىن تالدىقورعاندىق المات يماشەۆ يەلەندى.
ايەلدەر اراسىندا ءبىرىنشى، ەكىنشى جانە ءۇشىنشى ورىنداردى گۇلجانات جاناتبەك، اقمارال مەيىرمان مەن ماريا كيرەيەۆا ءوزارا ءبولىستى. استانا قالاسىنىڭ اكىمى اسەت يسەكەشوۆ جەلاياقتارعا اقشالاي سىيلىقتار تابىس ەتتى.
21,1 شاقىرىمدىق جارىستا ايەلدەر اراسىندا دانا ايدوسوۆا (ءبىرىنشى ورىن)، ولگا بوگومولسكايا (ەكىنشى ورىن)، الەيشا ۋون (ءۇشىنشى ورىن) جەڭىمپازدار دەپ تانىلدى. ءدال وسى ارا قاشىقتىقتا ەردەر اراسىندا الەكسەي گۋساروۆ (ءبىرىنشى ورىن)، قۇدايبەرگەن زەينوللايەۆ (ەكىنشى ورىن)، ەۆگەني مەدۆەدنيكوۆ (ءۇشىنشى ورىن) توپ جاردى.
10 شاقىرىمدىق جارىستا ەرلەر اراسىندا ءبىرىنشى ورىننان بەيبىت سەرىكوۆ، ەكىنشى ورىننان ەراسىل مۇقتاي ، ءۇشىنشى ورىننان ارتيوم چيجيەۆسكي كورىندى. ايەلدەر اراسىندا ءبىرىنشى، ەكىنشى، ءۇشىنشى ورىنداردى جاقسىگۇل مۇسىرماۋ، ەۆگەنيا بۋلگاكوۆا يجانە پەررين بەرا ءوزارا بولىسكە سالدى.
ايتا كەتەيىك، 42,2 شاقىرىم قاشىقتىققا استانالىق مارافون بويىنشا جۇلدە قورى بەكىتىلدى. جەڭىمپاز 850 مىڭ تەڭگە كولەمىندە اقشالاي سىيعا جانە كەز كەلگەن باعىتتا اۋە بيلەتىنە يە بولادى. ال ەكىنشى ورىنعا - 200000، ۇشىنشىگە - 100000 تەڭگە بەرىلمەك. 21,1 شاقىرىمدا مارە سىزىعىن ءبىرىنشى بولىپ باسقان ادامعا 60 000 تەڭگە، ەكىنشىگە -50000، ءۇشىنشى ورىنعا 40 000 تەڭگە تابىستالادى. بۇدان بولەك، 10 شاقىرىمدىق قاشىقتىقتى ءبىرىنشى بولىپ ەڭسەرگەنگە 30000 تەڭگە، ەكىنشىگە - 25000، سونداي-اق ءۇشىنشى ورىندى يەلەگەن ادامعا 20000 تەڭگە بەرىلەدى.