لاس-ۆەگاستا «گولوۆكين- الۆارەس» بوكس كەشى باستالدى

None
None
استانا. قازاقپارات - ا ق ش- تىڭ لاس- ۆەگاس قالاسىنداعى T- Mobile Arena-دا بوكس الەمىندەگى جىلدىڭ باستى شارالارىنىڭ ءبىرى - قازاقستاندىق بوكسشى گەننادي گولوۆكين (37-0, 33 ك و) مەن مەكسيكالىق ساۋل الۆارەستىڭ (49-1-1, 34 ك و) جەكپە-جەگى وتەتىن كەش باستالدى، دەپ حابارلايدى قازاقپارات.

ءبىرىنشى بولىپ شارشى الاڭعا اسا جەڭىل سالماقتاعى ايەلدەر شىقتى. اقش بوكسشىسى مارلەن ەسپارسا (2-0, 0 كو) مەن مەكسيكالىق اراسەلي پالاسيوس (8-7-1, 1 ك و) اراسىنداعى التىراۋندتىق ايقاس ەسپارسانىڭ جەڭىسىمەن اياقتالدى.

ەكىنشى بولىپ ءبىرىنشى جارتىلاي ورتا سالماقتاعى بوكسشىلار - امەريكالىق ۆەردجيل ورتيس (6-0, 6 كو) پەن مەكسيكالىق سەسار ۆالەنسۋەلا (7-1, 2 ك و) كەزدەستى. التىراۋندتىق جەكپە- جەك ەكىنشى راۋندتا ا ق ش وكىلىنىڭ ورىنداۋىنداعى تەحنيكالىق نوكاۋتپەن اياقتالدى. بۇل ۆەردجيل ءورتيستىڭ كاسىپقوي رينگتەگى جەتىنشى جەڭىسى.

شارشى الاڭعا شىققان ءۇشىنشى جۇپ - ۋكراينالىق سەرگەي بوگاچۋك (4-0, 4 ك و) پەن مەكسيكالىق حوان حوسە ۆالەنسۋەلا (5-8-1, 5 ك و). جارتىلاي ورتا سالماقتاعى بوكسشىلاردىڭ ءتورت راۋندقا ەسەپتەلگەن جەكپە- جەگى مەرزىمىنەن بۇرىن اياقتالدى. سەرگەي بوگاچۋك مەكسيكالىق قارسىلاسىن ەكىنشى راۋندتا تەحنيكالىق نوكاۋتقا جىبەردى.

بوكس كەشىنىڭ اندەركارتىندا تاعى ءبىر ايقاس ءوتۋى ءتيىس بولعان. بوكسشى قىزدار - امەريكالىق نيكول ادامس (2-0, 1 ك و) پەن ۆەنگريالىق الەكساندرا ۆلايكتىڭ (11-6, 2 ك و) كەزدەسۋى وتپەيتىنى حابارلاندى.

ەسكە سالايىق، كەشتىڭ PPV- كاردىندا ءتورت جەكپە-جەك وتەدى: رەندي كابالەرو (24-0، 14 ك و) - ديەگو دە لا حويا (19-0, 9 ك و)؛ دجوزەف دياس (24-0, 13 ك و) - رافاەل ريۆەرا (25-0-2, 16 ك و)؛ رايان مارتين (19-0, 11 ك و) - فرانسيسكو روحو (20-2, 13 ك و) جانە گەننادي گولوۆكين (37-0, 33 ك و) - ساۋل الۆارەس (49-1-1, 34 ك و).

قازاقستاندا ترانسلياتسيانى «Qazsport» پەن «Qazaqstan» ارنالارى جۇرگىزەدى. بوكس كەشى استانا ۋاقىتىمەن تاڭعى ساعات 06:00-دە، ال گولوۆكين مەن الۆارەستىڭ ايقاسى شامامەن 08:50-دە باستالادى.

بۇعان دەيىن حابارلانعانداي، ساۋل الۆارەستىڭ بازالىق گونورارى - 5 ميلليون دوللار، گەنناديي گولوۆكيننىڭ سىياقىسى 3 ميلليون دوللار بولادى. دەگەنمەن، قوس بوكسشى دا قولدارىنا سەگىز تاڭبالى سوما الماق. سونداي-اق ولارعا ءىس- شارادان تۇسكەن تابىستىڭ ۇلەسى بەرىلەدى.

جەكپە- جەك وتكىزەتىن وزگە دە جۇپتاردىڭ گونورارلارى بەلگىلى بولدى: رەندي كابالەرو (24-0, 14 كو) (80 مىڭ دوللار) - ديەگو دە لا حويا (19-0, 9 ك و) (50 مىڭ دوللار). دجوزەف دياس (24-0, 13 ك و) (200 مىڭ دوللار) - رافاەل ريۆەرا (25-0-2, 16 ك و) (15 مىڭ دوللار). رايان مارتين (19-0, 11 ك و) (50 مىڭ دوللار) - فرانسيسكو روحو (20-2, 13 ك و) (25 مىڭ دوللار).

سوڭعى جاڭالىقتار