19:10, 16 - قىركۇيەك 2017 | GMT +6
وزبەكستاننىڭ مەملەكەتتىك قىزمەتشىلەرى نۇرسۇلتان نازاربايەۆتىڭ كىتابىن وقيدى
تاشكەنت. قازاقپارات - ەلباسى نۇرسۇلتان نازاربايەۆتىڭ «21- عاسىر تابالدىرىعىندا» كىتابى وزبەك تىلىندە جارىق كوردى.
وزبەكستان پرەزيدەنتى شاۆكات ميرزيەيەۆ بۇگىن ونىڭ ءبىر داناسىن ەلباسى نۇرسۇلتان نازاربايەۆقا سىيعا تارتتى، دەپ حابارلايدى قازاقپاراتتىڭ ارناۋلى ءتىلشىسى تاشكەنتتەن
«قۇرمەتتى نۇرسۇلتان ءابىش ۇلى، بىزگە دەگەن زور قۇرمەتپەن ءوزىڭىزدىڭ «21 - عاسىر تابالدىرىعىندا» دەپ اتالاتىن كىتابىڭىزدى سىيعا تارتپاقپىن. بۇل كىتاپ كەشە عانا وزبەك تىلىندە جارىق كوردى»، - دەدى وزبەكستان پرەزيدەنتى قازاقستان باسشىسى نۇرسۇلتان نازاربايەۆپەن شاعىن جانە كەڭەيتىلگەن قۇرامداعى كەلىسوزدەردەن كەيىنگى بىرلەسكەن مالىمدەمە بارىسىندا.
سونىمەن قاتار شاۆكات ميرزيەيەۆ بۇل كىتاپ وزبەكستان پرەزيدەنتى جانىنداعى مەملەكەتتىك باسقارۋ اكادەمياسىنىڭ تىڭداۋشىلارىنا ءدارىس رەتىندە وقىتىلاتىندىعىن اتاپ ءوتتى.
اۆتور: مارلان جيەمباي
