قاراعاندىدا پوشتاشى- دروندار ءوز جۇمىسىن باستادى
ۇشۋ اپپاراتتارى الىس شالعايداعى اۋىلدارعا پوشتانى جەتكىزۋ ءۇشىن قولدانىلاتىن بولادى. بۇل تۋرالى «قازپوشتا» ا ق باسقارما ءتوراعاسى ساكەن سارسەنوۆ ءمالىم ەتتى.
- بۇل باسپا ءسوز ونىمدەرى مەن حاتتاردى جەتكىزۋدە ۋاقىتتى ۇنەمدەيدى، - دەدى ول. - ەگەردە بۇل قۇرىلعىنى ىسكە قوسقانشا ءبىز كۇنىنە باسىلىمداردىڭ تەك 12 پايىزىن جەتكىزىپ وتىرساق، ەندى 48 پايىزىن ۋاقتىلى جەتكىزەمىز. تەحنولوگيانى رەسمي تۇردە بۇگىن ۇشىرىپ جاتقانىمىزبەن، سىناق تۇرىندە ءبىز ونىمەن ءبىر ايداي جۇمىس جاسادىق. وسى ۋاقىت ارالىعىندا دروندار 9000 شاقىرىمدى ۇشىپ ءوتتى، 250 ساعات ۇشتى جانە 500 كەلى جۇكتى جەتكىزدى.
ۇشقىشسىز ۇشاقتار كادىمگى ۇشاقتاردىڭ شاعىن تۇرىنە ۇقسايدى، ولار جوعارى تەحنولوگيالىق ماتەريال - كوبىكتەنگەن پوليحلورۆينيلدەن جاسالعان، ول اۆياوندىرىستە ءجيى قولدانىلادى. قۇرىلعىنىڭ تۇبىنە جۇك ءىلىنىپ، ول ناقتى جەرىنە جەتكەندە اۆتوماتتى تۇردە تۇسىرىلەدى. وسىدان كەيىن ۇشۋ اپپاراتى كەرى اينالىپ، باستاپقى ورنىنا قايتىپ كەلەدى. قۇرىلعىمەن بايلانىس جوعالعان نەمەسە فورم- ماجورلىق جاعدايلاردا ارنايى باعدارلاما قوسىلادى، ول ارقىلى دروندى تاۋىپ، جۇكتى قاجەتتى ورنىنا جەتكىزۋگە بولادى. مۇنداي ءبىر اپپاراتتىڭ باعاسى شامامەن 4 ميلليون تەڭگە كولەمىندە.
«قازپوشتا» ا ق جاڭا تەحنولوگيالاردى ەنگىزۋ ارقىلى قارجىلارىن ۇنەمدەي الادى. سەبەبى، اكسيونەرلىك قوعام ۇشۋ اپپاراتتارىن ساتىپ العان جوق. ولاردىڭ بارلىعى «Adrome Automation» كومپانياسىنا تيەسىلى. «قازپوشتا» تەك دروندار قىزمەتىنە عانا اقى تولەيدى.
- بۇعان قىزمەتتىك باعدارلاما بويىنشا مەملەكەتتىك- جەكەشەلىك سەرىكتەستىك ارقىلى قول جەتكىزىپ وتىرمىز، - دەپ ءتۇسىندىردى ساكەن سارسەنوۆ. - ياعني ءبىز جابدىقتى ساتىپ المايمىز، تەك قانا قىزمەتىنە اقى تولەيمىز. ۇشۋدىڭ ءبىر شاقىرىمى 90 تەڭگەنى قۇرايدى. كليەنتتەر ءۇشىن باسپا ءسوز ونىمدەرى مەن حاتتاردى جىبەرۋ اقىسى ارتتىرىلمايدى.
ايتا كەتەيىك، ۇشقىشسىز ۇشاقتار مىقتى: ولار ەكى كەلىگە دەيىن جۇكتى جەتكىزە الادى جانە 100 شاقىرىمعا دەيىن ۇشا الادى، اككۋمۋلياتورلارىنىڭ قۋاتتىلىعى ەكى ساعاتقا جەتەدى. دروندا كۇن سۋىقتا دا، جاڭبىردا دا، از قار جاۋعاندا دا جانە ازداعان جەلدە دە ۇشا الادى. الايدا جەل ەكپىنى سەكۋندىنا 10 مەتردەن اسسا اپپاراتتى ۇشىرۋعا بولمايدى. سول سەبەپتى بۇگىن جەل پوشتاشى- دروندى ۇشىرۋعا كەدەرگى كەلتىردى.
- جوبا ءالى قابىلدانعان جوق. درون مەن كومپيۋتەردىڭ بايلانىس ارناسى باسقاشا، تەلەمەتريكالىق، - دەيدى «Adrome Automation» كومپانياسىنىڭ ديرەكتورى الەكسەي كيم.
- كوبىنە جۇيە العاشقى كەزەڭدە تۇراقتى جۇمىس جاسامايدى. كەيبىر ولقىلىقتار بار، ءبىراق ولار جويىلۋدا. بۇگىن تاڭەرتەڭ دروندى سول جەرگە ۇشىرعان ەدىك، ءبارى جاقسى بولعان، بەلگىلەنگەن ورىندا 10 مينۋتتا جەتتى. ول كەزدە جەل ازداۋ بولدى. قازىر ونىڭ جىلدامدىعى سەكۋندىنا شامامەن 7 مەتر، درونداردى ۇشىرۋ ءۇشىن رۇقسات ەتىلەتىن ماكسيمالدى جەل ەكپىنى سەكۋندىنا 10 مەتردى قۇرايدى. اۋىلدىق پوشتاشىلار بۇل باستامانى قولدادى.
- ءبىزدىڭ پوشتاشىلارىمىزدىڭ جاعدايى جاقسى: بىزگە جاڭا كيىم ۇلگىسى مەن ۆەلوسيپەدتەر بەرىلدى. درون قاجەتتى نارسە دەپ ويلايمىن، - دەيدى دۋبوۆكا اۋىلىنىڭ پوشتا قىزمەتىنىڭ قىزمەتكەرى ۆاسيلي گەركو. - درونداردى جىبەرۋشىلەرمەن بايلانىستا بولۋ ءۇشىن بىزگە سمارتفوندار بەردى. نەگىزى بۇل ءبىزدىڭ جۇمىسىمىزدى جەڭىلدەتەدى - بۇگىن درون، ەرتەڭ، مۇمكىن قارمەن جۇرەتىن كولىكتەر بەرەر، ۇنەمى العا جىلجۋ كەرەك.
ازىرگە ۇشقىشسىز ۇشاقتار ەلىمىزدىڭ ءتورت وبلىسىنا عانا پوشتانى جەتكىزەتىن بولادى، ولار: قاراعاندى، الماتى، جامبىل جانە وڭتۇستىك قازاقستان وبلىستارى. ءبىزدىڭ ايماقتا ۇلىتاۋ اۋدانىنىڭ 28 ەلدى مەكەنىنە، اقتوعاي اۋدانىنىڭ قوشقار اۋىلىنا، جاڭاارقا اۋدانىنىڭ ەكى اۋىلى مەن وساكاروۆكا اۋدانىنىڭ ەكى اۋىلىنا پوشتا شاعىن ۇشاقپەن جونەلتىلەتىن بولادى.