اۋا رايى
Астана 18 °С
Алматы 16 °С
ۆاليۋتا باعامى
USD 341.61
EUR 410.27
RUB 5.90
CNY 51.98

ەتنواۋىل ەلىمىزدىڭ بەدەلىن بيىكتەتتى - عاريفوللا ەسىم

ەتنواۋىل ەلىمىزدىڭ بەدەلىن بيىكتەتتى - عاريفوللا ەسىم
16 قىركۇيەك 11:50 200

استانا. قازاقپارات - استانادا 3 اي بويى وتكەن ەكسپو-2017 حالىقارالىق كورمەسى اياسىندا اشىلعان «ەتنواۋىل» ۇلتتىق مادەني كەشەنى تۋرالى كوپشىلىك حاباردار. «ەتنواۋىل» اتالعان كەزەڭ ىشىندە كورمەگە كەلۋشىلەردىڭ باستى تۋريستىك وبەكتىسىنە اينالدى.

 وسىعان وراي قازاقپارات عالىم، فيلوسوفيا عىلىمدارىنىڭ دوكتورى عاريفوللا ەسىمنىڭ اتالعان ۇلتتىق كەشەن تۋرالى پىكىرىن جاريالايدى..

**

تاريحىندا تاعدىر تالكەگىنىڭ تالايىن كورگەن حالقىمىزدىڭ كەڭپەيىلدىگى، قوناقجايلىعى حاقىندا كوپ ايتىلادى، ال بۇل اكسيوما اقيقات. ءبىراق بەيبىت جاعدايداعى ەلىمىزدە قازىرگى كۇندەرى حالىقتىڭ قالاي ءومىر ءسۇرىپ جاتقانى، نەنى ۇلاعات تۇتىپ، نەنى قالايتىنى، جالپى العاندا، جاراتىلىسى، بولمىس- ءبىتىمى قانداي ەكەنى الەمنىڭ كوپشىلىگىنە بۇعان دەيىن بەيمالىم بولىپ كەلگەن. مىنە، وسى ساۋالدارعا جاۋاپ الۋ ءۇشىن، قازاق ەلىن تانىپ- بىلۋگە ۇمتىلعان شەتەلدىك كىم ءۇشىن دە، بيىل زور مۇمكىندىك تۋدى. بۇعان ەلوردامىز استانادا جانعا جايلى جاز ايلارىندا اشىلعان «ەكسپو-2017» مامانداندىرىلعان حالىقارالىق كورمەسى تولىق جاعداي جاسادى. كورمەنىڭ مادەني باعدارلاماسى قازاقستاننىڭ باستى بايلىعى بىرەگەي مادەنيەت پەن كوپ ۇلتتى حالقىمىزدىڭ ءداستۇرىن جان- جاقتى، كەڭىنەن ناسيحاتتاۋعا باعىتتالعانى كوپ كوڭىلىنەن شىققانى داۋسىز.


ەتنواۋىل ەلىمىزدىڭ بەدەلىن بيىكتەتتى - عاريفوللا ەسىم

 پرەزيدەنتىمىز نۇرسۇلتان نازاربايەۆ جاريالاعان «ماڭگىلىك ەل» ۇلتتىق يدەيامىز، سونداي- اق تاۋەلسىز قازاقستاننىڭ قالىپتاسۋى، تابىستى دامۋى جانە جاس ەلوردامىز استانانىڭ گۇلدەنۋى مادەني ءىس- شارالار ارقىلى 93 كۇن بويى ەكسپو-2017 كورمەسىنىڭ اۋماعىندا، سونىمەن قاتار استانا قالاسىنىڭ بارلىق ساحنا الاڭدارىندا كورسەتىلدى. كەشەندى باعدارلاماداعى قازاق حالقىنىڭ تاريحى، مادەنيەتى مەن ءداستۇرىن اشاتىن ءىس- شارالارعا ەرەكشە كوڭىل بولىنگەنى قۋانتادى. ەڭ الدىمەن، ارينە، شەتەلدىكتەر حالىقتىڭ تىنىس- تىرشىلىگىن كۇندەلىكتى ولار كوپ بولاتىن ورىنداردا، ساۋدا- ويىن ساۋىق ورتالىقتارىندا، دەمالىس ورىندارى ساياباقتار مەن سپورتتىق مەكەن- جايلاردا، البەتتە، مۇراجايلار مەن قىزىقتى كورمەلەردە، سوسىن تەاترلاردان كورىپ- ءبىلىپ، تانىسا الادى. ال، وسىنىڭ ءبارىن ءبىر وزىنە بىرىكتىرە العان كورنەكتى جەر بولسا، تىپتەن جاقسى.

رەسپۋبليكامىزدىڭ مادەنيەت جانە سپورت مينيسترلىگى وسىنى ەسكەرە كەلە، جاقسى ءبىر كەشەندى ورتالىقتى ۋاقتىلى ىسكە قوسىپ، شەت جەردەن كەلگەندەردىڭ دە، ءوزىمىزدىڭ وتانداس تۋريستەرىمىزدىڭ دە كوڭىلىنەن شىققان سىڭايلى. بۇل ەتنومادەني كەشەنى. قازاق حالقىنىڭ ۇلتتىق ءداستۇرىن كەڭىنەن پاش ەتەتىن «ەتنواۋىل» ەتنومادەني كەشەنى «قازانات» يپپودرومىنىڭ اۋماعىنداعى 2,5 مىڭ شارشى مەتر اۋماقتى جەرگە ورنالاستىرىلىپتى. قازاقستاننىڭ جاعىمدى جانە ەلىمىزدىڭ تۋريستىك كوزتارتارلىق بەينەسىن قالىپتاستىرعان كەشەنگە ارنايى كەلىپ تاماشالاعان كوپشىلىكتىڭ قاراسى كورمە اياقتالعانشا، ءبىر تولاستامادى.

 
ەتنواۋىل ەلىمىزدىڭ بەدەلىن بيىكتەتتى - عاريفوللا ەسىم

العاشقى كۇننەن بۇل كەشەن شەتەلدىك قوناقتار ءۇشىن باستى تۋريستىك نىسانعا، قازاقستاندىقتاردىڭ وزدەرى ءۇشىن دە سۇيىكتى ورىنعا جانە كورمەنىڭ ۆيزيتتىك كارتاسىنا اينالىپ ۇلگەردى. كەشەن اۋماعىنداعى سان الۋان مادەني شارالار بىرىنەن سوڭ ءبىرى تارتىمدى ءارى ءۇزىلىسسىز ءجۇرىپ جاتتى. ەتنواۋىل بىرنەشە تاقىرىپتىق اۋماقتاردان قۇرالعان. ماسەلەن، «قولونەرشىلەر» سەكتورىندا قولدانبالى قازاق ونەرىنىڭ ەكسپوزيتسياسى كورسەتىلگەن: مۇندا كەسكىندەمە دە بار، زەرگەرلىك بۇيىمداردى ازىرلەۋ دە بار، سونداي- اق، اعاش ويۋ، قىش ىدىستاردى جاساۋ، كەستەلەۋ ونەرى جانە تاعى باسقا دا قازاق حالقىنا ءتان قولدانبالى ونەرلەر كوپشىلىك نازارىنا ۇسىنىلدى. شەتەلدىكتەر سول جەردە شەبەرلەرگە تاپسىرىس بەرىپ، وزدەرىنە ۇناعان بۇيىمدى كوزدەرىنشە جاساتىپ الىپ تا جاتتى، قازاقتاردىڭ ىسمەرلىگىنە تاڭداي قاعىپ، باستارىن شايقاعاننىڭ كۋاسى بولدىق. تاعى ءبىر، ياعني «ۇلتتىق ءدام ورتالىعى» سەكتورىندا ەتنواۋىل قوناقتارى قازاق حالقىنىڭ قوناقجايلىعىن باعالاي الدى، سونداي- اق، قازاق حالقىنىڭ ۇلتتىق اسحاناسىنىڭ الۋان تۇرىمەن تانىستى. مۇندا، كوپ شەت جەردەن كەلگەندەر ءۇشىن «بەسبارماق» اتالىپ جۇرگەن ناعىز قازاقي تاعامىمىز تالايدىڭ ءتىلىن ءۇيىرىپ، ماقتاۋىنا يە بولدى.

 
ەتنواۋىل ەلىمىزدىڭ بەدەلىن بيىكتەتتى - عاريفوللا ەسىم

 ۇلتتىق بولمىسىمىزدىڭ تاعى ءبىر باستى بەلگىسى اڭشىلىق كاسىپ «ءداستۇرلى اڭ اۋلاۋ ونەرى» سەكتورىندا كورىنىس تاۋىپتى. مۇنداعى اڭشى اعايىندارىمىز قۇستارمەن ءداستۇرلى اڭ اۋلاۋ ونەرى ساياتشىلىق جانە دالا اڭدارىن تازىمەن اۋلاۋ سەكىلدى قازاق حالقىنىڭ ەڭ سۇيىكتى كاسىبىن جاريا ەتتى. مەرگەندەر دە ءوز ونەرلەرىن حالىق نازارىنا وسىندا ۇسىنىپ جاتتى. قوناقتار مەن شەتەلدىك تۋريستەردى «ۇلتتىق ويىن جانە ويىن- ساۋىق» سەكتورى اسا قىزىقتىردى. وندا «كوكپار»، «سايىس»، «قىز قۋۋ»، «كۇمىس الۋ»، «التىباقان» سەكىلدى قازاقتىڭ ۇلتتىق ويىندارى مەن اسكەري- سپورتتىق ويىندار كورسەتىلىپ، اسىرەسە بۇلار شەتەلدىكتەر تاراپىنان جاقسى باعاسىن الدى.


ەتنواۋىل ەلىمىزدىڭ بەدەلىن بيىكتەتتى - عاريفوللا ەسىم

 ەكسپو كورمەسى ءوتىپ جاتقان كۇندەرى ەتنواۋىلدا كۇندەلىكتى «كونسەرتتىك الاڭدا» قازاقستان ونەر شەبەرلەرى مەن جۇلدىزدارىنىڭ قاتىسۋىمەن ءارتۇرلى جانرداعى كونسەرتتىك باعدارمالار ۇسىنىلدى. سونداي- اق، ەلىمىزدىڭ تۇكپىر- تۇكپىرىنەن كەلگەن شىعارماشىلىق ۇيىمدار، وبلىستاردان ارنايى كونسەرتتىك باعدارلامالارىمەن كەلگەن ۇجىمدار دا وزدەرىنىڭ ونەرلەرىن كورسەتىپ، كوپشىلىكتى قۋانتتى. سونداي- اق، وسى سەكتوردا وزبەكستان، ماجارستان، رەسەي، نورۆەگيا، مونعوليا، قىرعىزستان، تۇركيا ەلدەرى ارتىستەرىنىڭ قاتىسۋىمەن «The Spirit of Tengri» («ءتاڭىر رۋحى» ) جوباسىنىڭ اۆتورلارىمەن بىرلەسە وتىرىپ، «Nomads way» شاراسى دا كوڭىلدەن شىققان. ءبىر سوزبەن ايتقاندا، جۇمىس كۇندەرى ادەتتەگى قالىپتا تىنىمسىز جۇمىس ىستەگەن كەشەندە، اسىرەسە سەنبى، جەكسەنبىدە قارقىن ءتىپتى قىزا تۇسكەنىن كوردىك. دەمالىپ جۇرگەن كوپشىلىكتىڭ ەرەسەكتەرى وزگەشە قىزىق ىزدەمەي- اق، جوعارىدا اتالعان سەكتورلاردىڭ كەز- كەلگەنىنەن ىزدەگەنىن تاۋىپ جاتتى، ءبىرى كوكپار مەن اۋدارىسپاق قىزىقتاسا، ەندى بىرەۋلەر ساياتشىلىققا نازار اۋدارىپ الەك.

 بالالار مەن جاستارعا دا قالاعانىنشا قىزىق جەتكىلىكتى بولدى مۇندا. اسىرەسە اتقا ءمىنىپ، قىسقاشا سەرۋەندەۋ ءبىر عانيبەت دەسەك، اسىق ويناپ، بەل جازۋعا ۇمتىلعان، ءتىپتى جاستىق داۋرەنىن ەسكە تۇسىرۋگە اسىققان، ۇلكەندەر دە بۇل جەردە كوپتەپ سانالدى. اسىرەسە شەت ەلدەردەن كەلگەندەر وسىنىڭ ءبارىن قىزىق كورىپ، بالاشا قۋانىپ، قول شاپالاقتاعانى سىرت كوزگە وعاش تا كورىنىپ جاتتى. شىن مانىندە، ەتنواۋىل كەلۋشىلەردى قازاق حالقىنىڭ باي تاريحى، مادەنيەتى، ونەرى جانە سالت- داستۇرلەرىمەن تانىستىرىپ، كەز كەلگەن ادامعا كوشپەلى وركەنيەت پەن وتكەن عاسىردىڭ حال- احۋالىن سەزىنۋگە مۇمكىندىك جاسادى. ال، بۇل باستامانىڭ اياقسىز قالماي، ودان ءارى جالعاسۋىنا مادەنيەت جانە سپورت ءمينيسترى ارىستانبەك مۇحامەدي ۇلى ۋادە بەرىپ وتىر جانە بۇل ۇكىمەت تاراپىنان قولداۋ تاپسا نۇر ۇستىنە نۇر!

باستى سوزدەر: قوعام, مادةنيةت,
Нашли ошибку? Выделите её и нажмите CTRL+ENTER

پئكئر قالدئرؤ