زەرتتەۋ: الەمدە جىل سايىن لاستانۋدان 9 ميلليون ادام دۇنيە سالادى
بريتاندىق The Lancet مەديتسينالىق جۋرنالى الەمدە لاستانۋدان جىل سايىن كەم دەگەندە 9 ميلليون ادام مەزگىلسىز كوز جۇماتىنى جانە جىلىنا 5.5 تريلليون دوللار شىعىن كەلتىرەتىنى تۋرالى زەرتتەۋىن جاريالادى.
20 - قازاندا جاريالانعان زەرتتەۋدە 2015 -جىلى الەمدە مەزگىلسىز قايتىس بولعان ءار التىنشى ادامنىڭ ولىمىنە اۋانىڭ، سۋدىڭ نەمەسە توپىراقتىڭ لاستانۋى اسەر ەتكەنى ايتىلادى.
لاس تانۋدان كوز جۇمعان 9 ميلليون ادام جىل سايىن سپيد- تەن، تۋبەركۋلەزدەن، جانە بەزگەكتەن قايتىس بولعانداردىڭ سانىنان ءۇش ەسەگە، ال سوعىس پەن زورلىق- زومبىلىقتىڭ وزگە دە تۇرلەرىنەن قازا تاپقان ادامداردىڭ سانىنان 15 ەسەگە كوپ.
The Lancet اۋا، سۋ جانە توپىراقتىڭ لاستانۋىنان تۋىندايتىن اۋرۋلار مەن ادام ءولىمى تۋرالى زەرتتەۋدى ءبىرىنشى رەت جاساپ وتىر.
زەرتتەۋ جەتەكشىسى، ەپيدەميولوگ عالىم فيليپ لاندريگان Associated Press اگەنتتىگىنە لاستانۋدىڭ كوزگە كورىنىپ، سەزىلمەيتىن ۇلكەن پروبلەما ەكەنىن ايتتى.
الەم ەلدەرى اراسىندا لاستانۋ سالدارىنان مەزگىلسىز قايتىس بولعاندار سانى جاعىنان ءبىرىنشى ورىندا ءۇندىستان، ەكىنشى ورىندا قىتاي تۇر. ءۇندىستاندا 2015 -جىلى لاستانۋ اسەرىنەن 2.5 ميلليون، قىتايدا 1.8 ميلليون ادام كوز جۇمعان.
زەرتتەۋدە پاكىستان، بانگلادەش، سولتۇستىك كورەيا، وڭتۇستىك سۋدان جانە گايتي دە قامتىلعان.