الماتىدا شالا تۋعان شاقالاقتاردىڭ 98 پايىزى امان قالادى

الماتى. قازاقپارات - الماتىدا ەرىكتىلەر ۇيىمى حالىقارالىق شالا تۋعان نارەستەلەر كۇنى قارساڭىندا شاقالاقتارعا جىلى كيىم توقىپ بەردى، دەپ حابارلايدى قازاقپارات ءتىلشىسى.

جىل سايىن ەلىمىزدە تۋىلعان بالالاردىڭ %10-12 عا جۋىعى دۇنيەگە مەرزىمىنەن بۇرىن كەلەدى. ولاردى كۇتىپ-باعۋ اتا-اناسى مەن دارىگەرلەرگە جۇكتەلەدى.

سابيلەر العاشقى 2-3 ايدا دەنساۋلىعى مەن سالماعىنا بايلانىستى اۋرۋحانادا بولادى. نارەستەلەردىڭ تەرىسى تولىعىمەن دامىماعاندىقتان، كوبىنەسە شاقالاقتار توڭعاق كەلەدى.

«نيتي دوبرا» كلۋبىنىڭ ەرىكتىلەرى شالا تۋعان بالالارعا ارناپ 70 ارنايى توقىما كيىم توقىپ بەردى.

كيىمدەر جاس انالارعا قالالىق پەريناتالدىق ورتالىقتا جانە پەريناتولوگيا جانە بالالار كارديوحيرۋرگيا ورتالىعىندا تاپسىرىلدى.

اكسيا «ايالا» قايىرىمدىلىق قورىنىڭ قولداۋىمەن وتكىزىلدى. اتاپ ايتقاندا، سابيلەرگە شۇلىق، كەۋدەشە، باس كيىم، جىلى ورامال جانە العاشقى ويىنشىقتارى - سەگىزاياق بەرىلدى.

بۇگىن ورتالىققا كەزىندە اي-كۇنى جەتپەي تۋعان بالالار دا كەلدى. قازىر ولار ءوسىپ، بالاباقشالارعا جانە مەكتەپتەرگە بارىپ ءجۇر.

«مەديتسينا - وتە كۇردەلى عىلىم. كەي جاعدايدا جاڭا تۋعان نارەستەنىڭ دەنە قىزۋىن تومەندەتۋ قاجەت، ال كەيدە بالا توڭباۋعا ءتيىس. «ايالا» قورى ءبىزدىڭ نەوناتولوگتارمەن، شەتەلدىك پروفەسسورلارمەن ىنتىماقتاستىقتا پروبلەمانى شەشۋگە كەشەندى قاراۋعا تىرىسادى.

«نيتي دوبرا» - ەرىكتى جوبا، ول ءبىزدىڭ قورىمىزدىڭ تۇجىرىمداماسى - قازاقستاندا قايىرىمدىلىق مادەنيەتىن جانە ءداستۇرىن دامىتۋ ىسىنە تولىعىمەن سايكەس كەلەدى»، - دەدى «ايالا» قايىرىمدىلىق قورىنىڭ پرەزيدەنتى ايدان سۇلەيمەنوۆا.

«بۇگىندە ءبىزدىڭ ورتالىقتا بوسانعان ايەلدەردىڭ 10 پايىزى مەرزىمىنەن بۇرىن تۋادى. نارەستەلەردىڭ %98-99 امان قالادى. ورتا ەسەپپەن العاندا 800-1000 شالا تۋعان بالانىڭ 750- 950 ءوسىپ كەتەدى. 2000-جىلداردىڭ باسىندا %50 عانا امان قالاتىن. بۇگىندە ستاتيستيكا ەكى ەسەگە جاقساردى»، - دەدى ورتالىقتىڭ جانساقتاۋ ءبولىمىنىڭ مەڭگەرۋشىسى اينۇرىم سارباس.

«ايالا» قورى «تىنىس ال، بالاقاي» جوباسىنىڭ شەڭبەرىندە 2009 -2016-جىلدار ارالىعىندا پەريناتالدىق ورتالىعى مەن الماتى قالاسىنداعى پەريناتولوگيا جانە پەدياتريالىق كارديوحيرۋرگيا ورتالىعىنىڭ بالالار جان ساقتاۋ بولىمشەلەرىنە قۇنى 100,2 ميلليون تەڭگە بولاتىن زاماناۋي مەديتسينالىق اپپاراتۋرا سىيعا تارتقان بولاتىن.

بۇل مەديتسينالىق جابدىق الماتى قالاسىنداعى نارەستەلەر ءولىمىنىڭ دەڭگەيىن تومەندەتۋگە كومەكتەستى.