داريعا نازاربايەۆا ت72 «تانكىسىمەن» وق اتتى
دەپۋتاتتاردى اتالعان اسكەري ينستيتۋت باسشىسى پولكوۆنيك سەرىك اسانوۆ قارسى الىپ، وقۋ ورنىنىڭ تاريحى مەن بۇگىنگى احۋالىن بايانداپ بەردى.
«قۇرلىق اسكەرلەرىنىڭ اسكەري ينستيتۋتى 1970 -جىلى قۇرىلعان. 2003 -جىلى ق ر ۇكىمەتىنىڭ №1080 قاۋلىسىمەن ق ر ق ك الماتى جوعارى اسكەري ۋچيليشەسى قۇرلىق اسكەرلەرىنىڭ اسكەري ينستيتۋتى بولىپ وزگەرتىلدى. وقۋ ورنىنىڭ باستى مىندەتى - قۇرلىق اسكەرلەرىنىڭ قۇرىلىمدارىنا جوعارى مامانداندىرىلعان وفيتسەرلەردى ازىرلەۋ. ينستيتۋت وفيتسەرلەردى 14 ماماندىق بويىنشا دايىندايدى»، - دەدى سەرىك اسانوۆ.
ينستيتۋت باسشىسىنىڭ ايتۋىنشا، وقۋ ورنى زاماناۋي وقۋ- ماتەريالدىق بازامەن، تەحنيكالىق وقۋ قۇرالدارىمەن تولىقتاي قامتاماسىز ەتىلگەن.
«1000-عا جۋىق كۋرسانت قازىر ءبىلىم الىپ جاتىر. جىل سايىن 400 ادام قابىلدايمىز. ق ر قورعانىس مينيسترلىگى تاراپىنان وقۋ بازاسىن كۇشەيتۋگە بارىنشا كومەك كورسەتىلىپ كەلەدى. قازىرگى ۋاقىتتا قورعانىس سالاسىنىڭ 70 پايىزى ءبىزدىڭ تۇلەكتەرىمىز. ءبىزدىڭ كۋرسانتتارىمىز تاجىريبە الماسۋ ءۇشىن ا ق ش- قا، رەسەيگە بارادى. ءبىرقاتار ماماندىقتار بويىنشا تۇركيا، قىتاي، رەسەيدە كۋرسانتتار ءبىلىم الىپ جاتىر»، - دەدى پولكوۆنيك اسانوۆ.
ينستيتۋت باسشىسى وقۋ ورنىنا وزگە ەلدەردەن كەلىپ ءبىلىم الاتىندار بار ەكەنىن ايتتى.
«قازاقستان ازاماتتارىمەن قاتار، تاجىكستان مەن قىرعىزستاننان كەلىپ وقىپ جاتىر. قازىرگى ۋاقىتتا شەتەلدىك 100 كۋرسانت بار. جالپى، ينستيتۋت قۇرىلعالى وزگە ەلدىڭ 200 ازاماتى ءبىلىم الىپ شىقتى. جالپى قۇرىلعالى بەرى وقۋ ورنى 17 مىڭ وفيتسەر دايىندادى. ينستيتۋت اۋماعى 7 گەكتار جەردى الىپ جاتىر. قازىرگى ۋاقىتتا ءبىزدىڭ تۇلەكتەردىڭ ىشىنەن شىققان 70 گەنەرال بار. تاجىكستان دا ءبىزدىڭ تۇلەكتەردى اسا جوعارى باعالايدى»، - دەدى ول.
ينستيتۋت باسشىسىن تىڭداعان داريعا نازاربايەۆا جەتىستىكتەرى ماقتانۋعا تۇرارلىق ەكەنىن ايتتى.
«ينستيتۋتقا ءبارىمىز تاڭ قالىپ جاتىرمىز. قۇرال- جابدىقتارمەن 100 پايىز قامتىلعان. ناعىز اسكەري ينستيتۋت دەسە بولادى. بيىل وسى وقۋ ورنىنا تۇسۋگە ءبىر ورىنعا 10 ادام تالاسقان ەكەن. اۋىلدان جاستار كەلىپ وقيدى. اسكەري ءبىلىم الىپ، 4 جىل وقىعاننان كەيىن قايدا جۇمىسقا ورنالاساتىنىن بىلەدى»، - دەدى داريعا نازاربايەۆا.
ينستيتۋت جۇمىسىن ارالاۋ بارىسىندا داريعا نازاربايەۆا «Т72, Т72Б» تانكىلەرىنىڭ ماكەتىندەگى اۆتوماتتاندىرىلعان اتۋ قۇرالىمەن نىسانانى كوزدەپ، بىرنەشە وق اتتى.
«وسىنداي قۇرىلعىلار ارقىلى قاراجاتتى ۇنەمدەۋگە بولادى. ءبىراق پوليگوندا وقۋ، اتۋ جاتتىعۋلارىنان ءوتۋ - ول مۇلدە باسقا. مۇندا ويىن اۆتوماتىندا وتىرعانداي كۇيدە بولدىم»، - دەدى داريعا نازاربايەۆا.
ق ر حالىق قاھارمانى، سەنات دەپۋتاتى تالعات مۇسابايەۆ داريعا نازاربايەۆانىڭ بۇل جاتتىعۋىن اسكەري ادام رەتىندە جوعارى باعالادى.
«داريعا نۇرسۇلتان قىزى ت72 وقۋ- جاتتىعۋ تانكىسىنىڭ كابيناسىنا كىرىپ، وق اتتى. جاقسى ناتيجە كورسەتتى. ۇلگىلى كۋرسانتتىڭ تاپسىرماسىن ورىندادى، ونى كەز كەلگەنىمىز بىردەن جاساي الماس ەدىك. ءبىرىنشى رەت وتىرىپ تۇرعان ادام مۇنداي ناتيجە كورسەتكەنى، ونىڭ نەگىزى بار ەكەنىن كورسەتەدى. كوميتەت ءتورايىمىنىڭ ءوزى كەلىپ، جاعدايدى كوزىمەن كورۋى بۇل جاقسى دۇنيە»، - دەدى تالعات مۇسابايەۆ.
تالعات مۇسابايەۆ ينستيتۋتقا دەيىن شەكارا زاستاۆاسىندا، «قورعاس» كەدەن بەكەتىندە بولعانىن ايتتى.
«ءبىز كەشە شەكارا زاستاۆاسىندا بولىپ، «قورعاستاعى»، جاركەنتتەگى شەكاراشىلاردىڭ جاعدايىمەن تانىستىق. بۇگىن قۇرلىق اسكەرلەرىنىڭ اسكەري ينستيتۋتىنا كەلىپ وتىرمىز. ءبىزدىڭ ماقساتىمىز - اسكەري مەكەمەلەرمەن تانىسۋ. ءبىز قورعانىس سالاسىن تولىعىمەن قامتاماسىز ەتۋىمىز كەرەك»، - دەدى تالعات مۇسابايەۆ.
ايتا كەتەيىك، وقۋ ورنى جىل سايىن 400 كۋرسانت قابىلدايدى. اقىلى وقۋ ءتۇرى جوق. ورتا مەكتەپ بىتىرگەن تۇلەكتەر ۇ ب ت ناتيجەسىمەن قوسىمشا ەمتيحاندار تاپسىرادى.
