سولتۇستىك وڭىرلەرگە 665 وتباسىن كوشىرۋ كوزدەلىپ وتىر

None
None
 شىمكەنت. قازاقپارات - وڭتۇستىك قازاقستان وبلىسى اكىمدىگىنىڭ ۇيىمداستىرۋىمەن شىمكەنت قالاسى مەن سايرام اۋدانىندا ىشكى كوشى- قون جانە قونىستاندىرۋ ماسەلەسىنە بايلانىستى جارمەڭكە وتكىزىلدى.

وندا وزگە وڭىرلەردەن كەلگەن دەلەگاتتار بوس جۇمىس ورىندارىن ۇسىنىپ، وڭتۇستىكقازاقستاندىقتاردى ەلىمىزدىڭ سولتۇستىك ايماقتارىنا قونىس اۋدارۋعا شاقىردى، دەپ حابارلايدى و ق و اكىمىنىڭ باسپا ءسوز قىزمەتى

ونداعى ماقسات - ەلباسىنىڭ تاپسىرماسىنا سايكەس ەلىمىزدەگى ىشكى كوشى- قون پروتسەستەرىن رەتتەۋ جانە ەڭبەك رەسۋرستارىنىڭ تەڭگەرىمدىلىگىن ارتتىرۋ، حالىقتى بىركەلكى جايعاستىرۋ، ەڭبەك كۇشى مول ايماقتان، ەڭبەك كۇشى جەتىسپەيتىن وڭىرلەرگە حالىقتى ءوز ەرىكتەرىمەن قونىستاندىرۋ.

شارا بارىسىندا سولتۇستىك قازاقستان، پاۆلودار، قوستاناي جانە شىعىس قازاقستان وبلىستارىنان كەلگەن قوناقتار حالىققا جۇزدەگەن بوس جۇمىس ورىندارىن ۇسىندى. ولاردىڭ قاتارىندا مەملەكەتتىك قىزمەتتەن باستاپ ءبىلىم، اۋىل شارۋاشىلىعى جانە الەۋمەتتىك سالالار بار. سونداي- اق، جەكە كاسىپ اشىپ، بيزنەسپەن اينالىسقىسى كەلەتىن ازاماتتارعا مەملەكەت تاراپىنان تۇرعىن ءۇي، جەر، الەۋمەتتىك پاكەت بەرىلىپ، اكىمدىكتىڭ تۇراقتى باقىلاۋىندا بولاتىنى ايتىلدى.

وڭتۇستىك قازاقستان وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى م. وتارشيەۆ ءوز سوزىندە اتقارىلىپ جاتقان شارالاردى تۇرعىندار وڭ باعالاپ، ناتيجەسىندە قونىس اۋداراتىنداردىڭ قاتارى ارتىپ كەلە جاتقانىن ايتتى.

«حالقى تىعىز ورنالاسقان اۋدانداردا جۇرگىزىلگەن اقپاراتتىق- ءتۇسىندىرۋ جۇمىستارىنىڭ ناتيجەسىندە اتالعان وبلىستارعا كوشۋگە نيەت بىلدىرگەندەر بارشىلىق. ماسەلەن، 2015-2017 -جىلدارى 1392 مۇشەسى بار 347 وتباسى سولتۇستىك وڭىردەرگە قونىس اۋداردى. كوشىپ بارعان ءاربىر جانۇيانىڭ كەمىندە ءبىر ادامى جۇمىسپەن قامتىلىپ، ءتۇرلى سالادا جەمىستى جۇمىستار اتقارىپ كەلەدى. ال، بيىل 665 وتباسى قونىس اۋدارادى دەپ جوسپارلانۋدا» ، - دەدى مۇحيت وتارشيەۆ.

بۇگىندە ۇكىمەت تاراپىنان قونىس اۋدارۋشىلارعا جاعداي جاساۋ ءۇشىن زاڭنامالارعا وزگەرىستەر ەنگىزىلگەن. اتاپ ايتقاندا، سولتۇستىك ايماقتارعا كوشۋ ءۇشىن وتباسىنىڭ ءاربىر مۇشەسىنە 84175 تەڭگە مولشەرىندە قارجىلاي كومەك بەرىلەدى. ءبىر جىل بويى ءۇيدى جالعا الۋ جانە كوممۋنالدىق قىزمەتتەرگە اقى تولەۋ ءۇشىن 72150 تەڭگەگە دەيىن قارجى تولەنەدى. سونداي- اق، جاڭا جۇمىس ورنىن اشىپ، 5 قونىس اۋدارۋشىنى 3 جىل مەرزىمگە تۇراقتى جۇمىسپەن قامتىعان ازاماتقا ءاربىر جۇمىسكەر ءۇشىن 1082250 تەڭگە سۋبسيديا قارالعان.

سوڭعى جاڭالىقتار