10:50, 24 - قاراشا 2017 | GMT +6
قازاقستاندىق 5 شورت-ترەكشى وليمپياداعا جولداما الدى
استانا. قازاقپارات - وڭتۇستىك كورەيانىڭ پحەنچحان قالاسىندا وتەتىن قىسقى وليمپيادا ويىندارىنا قاتىساتىن شورت-ترەكشىلەرىمىزدىڭ ەسىمدەرى بەلگىلى بولدى، دەپ حابارلايدى قازاقپارات ءتىلشىسى.
قازاقستان ۇلتتىق وليمپيادا كوميتەتىنىڭ باسپا ءسوز قىزمەتى تاراتقان مالىمەتكە سۇيەنسەك، 23- قاراشا كۇنى الەم كۋبوگىنىڭ سەرياسىنان كەيىن، حالىقارالىق كونكيمەن سىرعاناۋ وداعى 2018-جىلى XXIII قىسقى وليمپيادا ويىندارىنا جولداما العان سپورتشىلاردى اتاعان.
شورت-ترەكشىلەرگە وليمپيادالىق جولداما 19- قاراشا مەن 28- قىركۇيەك ارالىعىندا بۋداپەشتتە (ۆەنگريا)، دوردرەحت (نيدەرلاندى)، شاڭحاي (قىتاي) جانە سەۋل (كورەيا) قالالارىندا وتكەن الەم كۋبوگىنداعى ناتيجەلەرگە قاراي بەرىلگەن.
وسى كەزەڭدەردىڭ ناتيجەسىنىڭ قورىتىندىسىنا سايكەس بەس قازاقستاندىق سپورتشى قىسقى وليمپيادا ويىندارىنا جولداما جەڭىپ الدى.
ولار - ەرلەر اراسىندا نۇربەرگەن جۇماعازيەۆ، ابزال اجعاليەۆ، دەنيس نيكيشا جانە قىزدار اراسىندا يونگ كيم مەن اناستاسيا كرەستوۆا.
اۆتور: كۇنسۇلتان وتارباي