الماتىدا 50 قىزدى الداپ كەتكەن جىگىت ۇستالدى

  استانا. قازاقپارات - الماتىدا الاياقتىق، قاراقشىلىق شابۋىل، جول اپاتىن جاساۋ (سالدارىنان ادام ولىمىنە اكەلىپ سوققان) سەكىلدى بىرنەشە قىلمىس جاسادى دەگەن كۇدىكپەن ەر ادام ۇستالدى، دەپ حابارلايدى الماتى قالاسى ءى ءى د باسپا ءسوز قىزمەتى.

34 جاستاعى كۇدىكتى الماتى قالاسىندا تۋعان، الاياقتىق بويىنشا سوتتالىپ شىققان. ول بىلتىردان بەرى ىزدەۋدە ءجۇرىپتى.

«ونىڭ قۇربانى كوبىنەسە جاس قىزدار بولعان. ولارمەن تانىسىپ، كوڭىلىن اۋلاعان. سەنىمىنە كىرگەننەن كەيىن، كەزدەسۋدىڭ بىرىندە ءبىر جەرگە شۇعىل بارىپ كەلۋ كەرەك ەكەنىن سىلتاۋ ەتىپ، قىزدىڭ كولىگىن سۇراپ، ءمىنىپ كەتىپ وتىرعان. سودان قايتىپ ورالمايتىن بولعان. نە جىگىت جوق، نە كولىك جوق. الماتى قالاسى بويىنشا وسىنداي 50 وقيعا تىركەلگەن» ، - دەپ حابارلايدى الماتى قالاسى ءى ءى د كريمينالدى پوليتسيا باسقارماسىنىڭ باسشىسى جانبولات زيادين.

كريمينالدى پوليتسيانىڭ حابارلاۋىنشا، ۇستالعان كۇدىكتى تۇركيا ازاماتىنا قاراقشىلىق شابۋىل جاساپ، 5 مىڭ دوللار اقشاسىن الىپ كەتكەنى بەلگىلى بولدى. بۇدان باسقا تاعى ءبىر ىسكە قاتىسى بارى انىقتالدى. وسى جىلى مامىر ايىندا ول 19 جاستاعى قىزدى قاعىپ كەتكەن. قىز قايتىس بولعان. كۇدىكتى وقيعا ورنىنان قاشىپ كەتىپتى.

«كۇدىكتى ءى ءى د ۋاقىتشا ۇستاۋ يزولياتورىنا قامالدى. تاعىلعان ايىپتار بويىنشا ءوزىنىڭ كىناسىن مويىنداپ وتىر. ۇستالعان كۇدىكتىنىڭ زاڭسىز ارەكەتتەرىنىڭ قۇربانى بولعان بارشا ازاماتتان اۋماق بويىنشا ءى ءى د- گە حابارلاسۋىن سۇرايمىز» ، - دەدى جانبولات زيادين.