21:42, 23 - ءساۋىر 2018 | GMT +6
ۇشاقتاعى ءبىر المانى العان كەلىنشەك 500 دوللار ايىپپۇل تولەيتىن بولدى
استانا. قازاقپارات - ا ق ش- تا جولاۋشى كريستال تەدلوك ۇشاقتاعى ءبىر المانى سومكەسىنە سالىپ العانى ءۇشىن 500 دوللار ايىپپۇل تولەيتىن بولدى.
ول پاريجدەن دەنۆەرگە ساپار شەككەن. ۇشۋ كەزىندە جولاۋشىلارعا تۇسكى اس تاراتىلعان. سول كەزدە ول كەيىنىرەك جەۋ ءۇشىن المانى الىپ، سومكەسىنە سالىپ العان.
كەدەن قىزمەتكەرلەرى ا ق ش- قا كەلگەن كەزدە المانى الىپ جۇرۋگە دەكلاراتسيا جاساماعانى ءۇشىن ايىپپۇل سالعان. كەدەنشىنىڭ سوزىنشە كەلىنشەك المانى ا ق ش شەكاراسىن كەسىپ وتكەنگە دەيىن جەۋى كەرەك بولعان.
دەرەككوز: كوررەسپوندەنت