ورالدا 407 ليفتىنىڭ 255 ى عانا جۇمىس جاسايدى
بۇل تۋرالى قازاقپارات تىلشىسىنە بقو ەنەرگەتيكا جانە تۇرعىن ءۇي-كوممۋنالدىق شارۋاشىلىعى باسقارماسى باسشىسىنىڭ مىندەتىن اتقارۋشى قۋانىش شارافۋتدين ايتتى.
قۋانىش شارافۋتدين ءمالىم ەتكەندەي، پايدالانۋ مەرزىمى اياقتالعاندىقتان، 132 ليفتىنى اۋىستىرۋ قاجەت. 20 ليفتى ىستەن شىققان.
«كەڭەس وداعى ىدىراعاننان كەيىن ۇيلەردىڭ باسىم كوپشىلىگى جەكەشەلەندىرىلىپ، جوندەۋ ماسەلەسى، سونىڭ ىشىندە ليفتىلەر جاعدايى جىلدار وتكەن سايىن كۇردەلەنە ءتۇستى. قولدانىستاعى زاڭناماعا سايكەس ليفت كوندومينيۋم نىسانىنىڭ ءبىر بولىگى بولىپ تابىلادى، ياعني ونى كۇتىپ ۇستاۋ جانە جوندەۋ نەمەسە اۋىستىرۋ پاتەر يەلەرىنىڭ ەسەبىنەن جۇرگىزىلۋى ءتيىس ەدى»، دەيدى قۋانىش سەرىك ۇلى.
2011 -جىلى تۇرعىن ءۇي- كوممۋنالدىق شارۋاشىلىعى سالاسىن جاڭعىرتۋدىڭ 2011-2020 -جىلدارعا ارنالعان مەملەكەتتىك باعدارلاماسى قابىلدانعانى بەلگىلى. مىنە، وسى باعدارلاما تەتىكتەرى نەگىزىندە 2011-2017 -جىلدارى ورالدا 14، اقساي قالاسىندا 11 ليفتى اۋىستىرىلدى.
2018 -جىلدىڭ باعامى بويىنشا 1 ليفتىنى اۋىستىرۋ قۇنى شامامەن 9-12 ميلليون تەڭگەنى قۇرايدى، سوندىقتان مۇنى پاتەر يەلەرى قاراجاتى ەسەبىنەن جۇزەگە اسىرۋ قيىندىق تۋعىزۋدا. سوعان قاراماستان، اتالعان باعدارلاما اياسىندا بيىل ورالدا 10، اقسايدا 6 ليفتىنى اۋىستىرۋ جوسپارلانىپ وتىر.
قۋانىش شارافۋتديننىڭ سوزىنە قاراعاندا، بۇدان بولەك تۇرعىن ءۇي-كوممۋنالدىق شارۋاشىلىعى ماسەلەلەرى بويىنشا قازاقستان رەسپۋبليكاسىنىڭ كەيبىر زاڭنامالىق اكتىلەرىنە وزگەرىستەر ەنگىزىلۋدە. ءتيىستى وزگەرتۋلەر ليفتىلەردى اۋىستىرۋ جانە جوندەۋدى جۇرگىزۋ بويىنشا جۇمىستاردى جەرگىلىكتى اتقارۋشى ورگانداردىڭ قۇزىرەتىنە بەرۋ قاراستىرىلعان.
«الدىن الا جاسالعان دەرەكتەر بويىنشا وڭىردەگى 298 ءليفتىنى اۋىستىرۋ جانە جوندەۋگە 3 ميلليارد استام تەڭگە قاجەت»، دەدى «قازاقپارات» تىلشىسىنە ق. شارافۋتدين.