قىزىلوردادا تەكەي باتىردىڭ 350 جىلدىعىنا ارنالعان تاريحي- تانىمدىق كەش ءوتتى
دەپ حابارلادى قازاقپارات ءتىلشىسى.
مىڭ ءولىپ، مىڭ تىرىلگەن حالقىمىزدىڭ تاريحي جادى ەل تاۋەلسىزدىگى جولىنداعى كۇرەستە ەرەكشە ەرلىكتەرىمەن دارالانعان حاندار مەن باتىرلاردى ەشقاشان سانامىزدان وشىرگەن ەمەس. ۇلتىمىزدىڭ مەملەكەت بولىپ قالىپتاسۋى جولىندا ەل تىزگىنىن ۇستاعان حاندار مەن ەل قورعاعان باتىرلاردىڭ ەسىمدەرى بۇگىنگى ۇرپاق الدىندا ۇلىقتالىپ، ناسيحاتتالۋدا.
باتىر بابامىز تەكەي قارپىق ۇلى - قازاق ۇلتىنىڭ مەملەكەتتىگىن نىعايتۋدا ولشەۋسىز ۇلەس قوسىپ، ەل بيلەۋ ىسىندەگى ءوزىنىڭ دانالىعىنىڭ ارقاسىندا تاۋكە حاننىڭ باس باتىرىنا اينالعان. ءاز تاۋكە حاننىڭ تۇسىندا بەس جورىق جاسالسا، 1711 -جىلعى شايقاستا تەكەي باتىر باس قولباسشى بولادى. تەكەي باتىردىڭ تاۋكە حاننىڭ تۇسىندا قولباسشى بولعانىن جانە قازاقتىڭ ۇلان- عايىر جەرىندەگى شايقاستاردىڭ كوپشىلىگىنە قاتىسىپ، ەل مەن جەر ءۇشىن تەر توككەنىن، ۇلتتىق باتىرىمىز دەپ دارىپتەپ، ەسىمىن ۇلىقتاۋعا ابدەن لايىقتى تۇلعا ەكەندىگى كەش بارىسىندا ءسوز ەتىلدى.
شاراعا قورقىت اتا اتىنداعى قىزىلوردا مەملەكەتتىك ۋنيۆەرسيتەتىنىڭ تاريح عىلىمدارىنىڭ كانديداتى، پروفەسسور مەرۋەرت اڭساتوۆا، «قورقىت تانۋ جانە ولكە تاريحى» عىلىمي- زەرتتەۋ ينستيتۋتىنىڭ عىلىمي قىزمەتكەرى باقىتجان احمەتبەك جانە ستۋدەنتتەر قاتىستى. سونداي- اق مۇندا «تاۋەلسىزدىك تۇمارى - تەكەي باتىر!» اتتى كىتاپ كورمەسى ۇيىمداستىرىلىپ، بيبليوگرافيالىق شولۋ جاسالدى.
اۆتور: ەلۋباي اۋەزوۆ