قاراعاندىدا پوليتسيا 33 جىل بۇرىنعى قىلمىستى اشتى
قاز ك س ر ءى ءى م ميليتسيونەرلەرى 1984-جىلدىڭ 5- شىلدە كۇنى ءبىر پاتەردەن ەكى ايەلدىڭ دەنەسىن تاپقان - 23 جانە 26 جاستاعى قىزدار ىشىمدىك ىشكەننەن كەيىن پىشاقتالعان.
«ميليتسيا قىزمەتكەرلەرى وقيعا ورنىنان 11 ساۋساق ءىزىن تاپقان. ونىڭ توعىزى ۇقساس بولىپ شىقسا، ەكى ساۋساق ءىزى انىقتالماعان»، - دەپ حابارلادى قاراعاندى وبلىستىق ىشكى ىستەر دەپارتامەنتى باسپا ءسوز قىزمەتىنىڭ باسشىسى باقىتجان قۇدياروۆ.
بۇل ساۋساق ىزدەرى 33 جىل بويى بازادا ساقتاۋلى تۇرعان. پوليتسەيلەر ءار قىلمىسكەردى ۇستاعان كەزدە سالىستىرىپ وتىرعان، الايدا ەشبىرىمەن سايكەس كەلمەگەن. تاياۋدا پوليتسەيلەر قىلمىس جاساعان كۇدىكتىنى قولعا ءتۇسىرىپ، ونىڭ ساۋساق ىزدەرىن العان.
«پوليتسەيلەر 33 جىل بۇرىنعى ساۋساق ىزدەرىمەن سالىستىرىپ، كۇدىكتىنىڭ ساۋساق ىزدەرىمەن سايكەس كەلەتىندىگىن انىقتادى. ول ۋاقىتشا ۇستاۋ وقشاۋلاعىشىنا قامالدى»، - دەدى باقىتجان قۇدياروۆ.
قىلمىس جاساعان كەزدە الگىنىڭ جاسى 23 تە بولعان. ول 26 جاستاعى ايەلدىڭ ۇيىندە قوناقتا بولعانىن، ىشىمدىك ىشكەننەن كەيىن ارالارىندا جانجال شىعىپ، ونىڭ 23 جاستاعى قۇربىسى مەن پاتەر يەسىن ولتىرگەنىن مويىندادى. وقيعا ورنىنان ءىزىن سۋىتىپ، پىشاقتى لاقتىرىپ جىبەرگەن. ق ر ق ك 33-بابى 2-ءبولىمى بويىنشا قىلمىستىق ءىس قايتا وندىرىسكە قابىلداندى.