تۇرىكمەنستاندا 30 عا تولماعان ەر ادامدار ەلدەن شىعا المايدى
بۇل تۋرالى «راديو ازاتلىك» باسىلىمى حابارلادى.
كوشى-قون قىزمەتىندەگى شەنەۋنىكتەردىڭ مالىمەتىنشە، مۇنداي شارالار ازاماتتاردىڭ قاۋىپسىزدىگى ءۇشىن قولدانىلىپ جاتىر. «مەنىڭ شەتەلگە كەتپەكشى بولعان 27 جاستاعى تانىسىمدى كوشى-قون قىزمەتىنىڭ وبلىستىق بولىمشەسىنە شاقىرتىپ الدى. بيلەتىن الىپ، اشحابادقا بارامىن دەپ ويلاماي-اق قويۋىن سۇرادى. ايتۋلارىنشا، 30 جاسقا تولماعان ەر ادامداردى شەتەلگە شىعارمايتىن جاڭا قاۋلى قابىلدانعان»، - دەپ جازادى باسىلىم دەرەككوزىنە سىلتەمە جاساپ.
سونداي-اق، دەرەككوزدىڭ ايتۋىنشا، كەيبىر ادامدارعا بيلەتتەرىنىڭ باعاسىن قايتارىپ بەرگەن. 9 -ساۋىردە قۇقىق قورعاۋ ورگاندارىنىڭ وكىلدەرى كوشەدە ناۋشنيكپەن ولەڭ تىڭداعان اشحاباد تۇرعىندارىنا ايىپپۇل سالا باستاعان ەدى. پوليتسياداعىلاردىڭ ايتۋىنشا، ناۋشنيكپەن ولەڭ تىڭداپ جۇرگەن جاياۋ جۇرگىنشىلەر كولىك ءوتىپ بارا جاتقانىن نەمەسە كولىك كەلە جاتقانىن ەستىمەي قالىپ، سالدارىنان ولاردى كولىك باسىپ كەتۋى مۇمكىن.
ولاردىڭ ايتۋىنشا، ىشكى ىستەر ءمينيسترى جولداردا جول-كولىك وقيعالارىن ازايتۋ تۋرالى بۇيرىق بەرگەن. ال 5 -ساۋىردە تۇرىكمەنستان بيلىگىندەگىلەر ەلگە ايەلدەرگە شومىلۋعا ارنالعان كيىم مەن شولاق شالبار اكەلۋگە تىيىم سالعان.
ەسكە سالا كەتەيىك ، وسىعان دەيىن تۇرىكمەنستاندا مەملەكەتتىك مەكەمەلەر مەن ۇيىمداردىڭ شەنەۋنىكتەرىنە تىرناق بوياپ، وسىرۋگە، كىرپىك وسىرۋگە، شاش بوياۋعا جانە التىن بۇيىمداردى تاعۋعا تىيىم سالۋ تۋرالى نورمانىڭ ەنگىزىلگەنى حابارلانعان بولاتىن. ءتىپتى قالاداعى سۇلۋلىق سالوندارىندا قىزمەتتىڭ بۇل تۇرلەرى تىزىمنەن الىنىپ، ەلگە كىرپىك پەن تىرناق وسىرۋگە ارنالعان ماتەريالداردى اكەلۋگە تىيىم سالىنىپتى. ال وسىدان كەيىن ايەلدەرگە ارنالعان وسىنداي ونىمدەردىڭ باعاسى 50 پايىزعا دەيىن قىمباتتاپ كەتكەن.
Kaz.tengrinews.kz