قازسات-2 نى الماستىراتىن جاڭا سپۋتنيك قانداي بولماق

استانا. قازاقپارات - ق ر قورعانىس جانە ايروعارىش ونەركاسىبى مينيسترلىگى «KazSat-2» جەر سەرىگىن الماستىراتىن جاڭا سپۋتنيك جايىندا تولىق ايتىپ بەردى،

 دەپ حابارلايدى قازاقپارات.

«KazSat-2R» سپۋتنيگىن قولدانىسقا ەنگىزۋ - ءبىرىنشى كەزەكتە قازىرگى كەزدەگى سپۋتنيكتىك بايلانىس پەن تەلەراديو حابارلارىن تاراتۋ جەلىلەرىنىڭ جۇمىسىن تۇراقتى تۇردە قامتاماسىز ەتۋگە نەگىزدەلگەن. بۇل تۇرعىدا قازاقستاننىڭ بارشا اۋماعىندا ورنالاسقان  4000 جۋىق جەردەگى سپۋتنيكتىك بايلانىس ستانسالارى بار. سونداي- اق سپۋتنيكتىك بايلانىس بويىنشا 12 وپەراتوردىڭ جانە ۇيىمداردىڭ قاجەتتىگىن قامتاماسىز ەتۋ ەسكەرىلگەن»، - دەپ اتاپ وتىلگەن مينيسترلىكتىڭ پارلامەنت ماجىلىسىندەگى «حالىق كوممۋنيستەرى» فراكسياسىنىڭ دەپۋتاتتىق ساۋالىنا بەرگەن جاۋابىندا.

 ۆەدومستۆو مالىمەتىنشە، «KazSat-2R» جوباسى اياسىندا جوعارى جىلدامدىقتى ينتەرنەتكە قولجەتىمدىلىكتى تولىقتاي قامتۋ ماقساتىن شەشۋگە مۇمكىندىك بەرىلەدى. بۇل ءوز كەزەگىندە قازاقستان ەكونوميكاسى سالالارىن سيفرلاندىرۋعا جاعداي جاسايدى.

«وسى جاعدايدا پەرسپەكتيۆالى سپۋتنيك اۋىلدىق ەلدى مەكەندەردە كەڭ جولاقتى ينتەرنەت جەلىسىن جانە ۇيالى بايلانىستى قۇرۋ ءۇشىن جۇمىس ىستەيدى. سونىمەن قاتار جەر سەرىگى قولدانىستاعى سپۋتنيكتىك بايلانىس جەلىلەرى مەن تەلەراديو حابار تاراتۋ قىزمەتىن ۇيىمداستىرۋعا باعىتتالعان»، - دەيدى مينيسترلىك وكىلدەرى.

 قازىرگى ۋاقىتتا جاڭا سپۋتنيكتىڭ تەحنيكالىق كەسكىنى مۇددەلى مەملەكەتتىك ورگاندارمەن بىرلەسە پىسىقتالۋدا. سونىمەن قاتار تەحنيكالىق شەشىمدەردىڭ ءتۇرلى نۇسقالارى دا قاراستىرىلىپ جاتىر. بەلگىلى بولعانداي، ۆەدومستۆوارالىق جۇمىس توبىنىڭ قورىتىندىسى بيىلعى قاراشانىڭ سوڭىندا جاسالادى جانە وسى جۇمىستار ۇكىمەتتىڭ قاراۋىنا ەنگىزىلمەك.

بۇدان بۇرىن حابارلانعانداي، ق ر قورعانىس جانە ايروعارىش ونەركاسىبى ۆيتسە- ءمينيسترى مارات نۇرعوجين قازاقستاندا «KazSat-2» جەر سەرىگى اۋىستىرىلاتىنىن ايتتى. «KazSat-2» جەر سەرىگىنىڭ جۇمىس ۋاقىتى 2023 -جىلعا دەيىن نەگىزدەلگەن، ياعني ول 12,5 جىل قىزمەت ەتۋى ءتيىس (2011 -جىلى عارىشقا شىعارىلدى).

 سوندىقتان ءبىز وسى جىلدان ونىڭ ورنىنا جاڭا عارىش اپپاراتىن دايىنداۋ جوباسىن ىسكە اسىرۋدى باستادىق. «2023-جىلى جاڭا سپۋتنيكتى سول نۇكتەگە ورنالاستىرامىز جانە بۇل شارالار بايلانىس وپەراتورلارىنا كەدەرگى كەلتىرمەيدى»، - دەگەن ەدى ماجىلىستەگى ۇكىمەت ساعاتىنان كەيىن. ونىڭ سوزىنە قاراعاندا، «KazSat-2» سالىنعان اقشانى 2018 -جىلى، ال «KazSat-3» 2021-جىلى اقتاپ، وسىدان كەيىن تازا كىرىس اكەلەدى.

 اۆتور: رۋسلان عابباسوۆ