اۋا رايى
Астана 10 °С
Алматы 10 °С
ۆاليۋتا باعامى
USD 333.03
EUR 392.61
RUB 5.82
CNY 50.54

اقتوبەلىك كاسىپكەر تاۋلىگىنە 2 كەلى سالماق قوساتىن ءىرى قارا ءوسىرۋدىڭ جولىن ايتتى

اقتوبەلىك كاسىپكەر تاۋلىگىنە 2 كەلى سالماق قوساتىن ءىرى قارا ءوسىرۋدىڭ جولىن ايتتى
13 قازان 13:54 135

اقتوبە. قازاقپارات - اقتوبەدە «Aktobe Invest-2017» حالىقارالىق فورۋمى ءوتىپ جاتىر.

اۋىل شارۋاشىلىعى قۇرىلىمدارىنىڭ دامۋىنا باعىتتالعان جيىندا اقتوبەلىك كاسىپكەر مال بورداقىلاۋ، ەت ەكسپورتتاۋ جولىن ايتىپ بەردى، دەپ حابارلايدى قازاقپارات ءتىلشىسى.

اقتوبەدە ءوتىپ جاتقان «Aktobe Invest-2017» حالىقارالىق فورۋمى اياسىندا «جاھاندانۋ كەزەڭىندەگى اگروونەركاسىپ كەشەنى جانە تاماق ونەركاسىبى» وتىرىسى ءوتتى. جيىنعا اۋىل شارۋاشىلىعى مينيسترلىگى، «نۇح» قازاگرو» ا ق، «قازاگروقارجى» ا ق، «قازاگرو ءونىم» ا ق، ايماقتىڭ اگرووندىرىستىك كەشەنى، جەرگىلىكتى قارجىلىق ينستيتۋت وكىلدەرى، شەتەلدىك ءىرى كومپانيالاردىڭ قۇرىلتايشىلارى قاتىستى.

قازىرگى كەزدە اقتوبە وبلىسىندا ەت، ءسۇت جانە استىق كلاستەرلەرى جاقسى دامىپ كەلەدى. سونىمەن قاتار، جىلىجاي، جەمىس- جيدەك داقىلدارى، بالىق ءوسىرۋ جانە ءداستۇرلى ەمەس شارۋاشىلىقتىڭ جۇمىسىندا دا ءوسىم بار. ماسەلەن، سوڭعى ءۇش جىلدا ءىرى قارا مالى 18,7 مىڭ باسقا، قوي 49,6 مىڭعا، جىلقى 13,6 مىڭ باسقا كوبەيدى. ەگىن القابىنىڭ كولەمى ارتىپ، سوڭعى ءۇش جىلدا 656 مىڭ گەكتارعا جەتتى. وڭىردە ەت ەكسپورتى جولعا قويىلدى. فورۋمعا قاتىسقان «اكتەپ» ج ش س قۇرىلتايشىسى نۇرلان ساعىناليننىڭ ايتۋىنشا، ەت كومبيناتى كەشەنى قالدىقسىز جۇمىس ىستەيدى. مۇندا 9 مىڭ باس بورداقىلاۋ الاڭىندا تۇر.

اۋىل شارۋالارى، قاراپايىم تۇرعىندار كۇنىنە 350-450 تايىنشا اكەلىپ، بورداقىلاۋعا تاپسىرادى. شارۋاشىلىقتا انگۋس تۇقىمدى ءىرى قارا تاۋلىگىنە 2 كەلى، ال اۋىل ادامدارىنىڭ مالى تاۋلىگىنە 1 كەلى سالماق قوسادى.

ايتا كەتەيىك، «اكتەپ» ج ش س ەت كومبيناتى 2015 -جىلى ىسكە قوسىلدى. كومپانيا ەتتى ءىرى قارا ءوسىرۋدىڭ باعدارلاماسىن ازىرلەدى. اۋىل، اۋدانداعى شارۋالاردىڭ مالىن باعىپ، سەمىرتىپ بەردى. ال شارۋا ءىرى قارانىڭ سالماعىنا اقى تولەيدى.

«قازىرگى كەزدە 3 مىڭ باس ءىرى قارانى جالعا الىپ وتىرمىز. ياعني، ءىرى قارانى باعامىز، جەمدەپ، سەمىرتەمىز. مالدى كەيىن شارۋاعا قايتارىپ بەرەمىز. جاڭا باعدارلاما بويىنشا جۇمىس باستالدى. شارۋاشىلىققا كەم دەگەندە 30 باس ءىرى قارا بولۋى كەرەك. ماماندار بارىپ، ءار ءىرى قارانى ولشەپ الادى. بۇل جۇمىستار كورشىلەس وبلىستاردا دا جۇرەدى»، - دەدى «اكتەپ» ج ش س قۇرىلتايشىسى نۇرلان ساعىنالين. مۇندا جىلىنا 7200 توننا ەت وڭدەيتىن كەشەن بار. ەت رەسەيگە ەكسپورتتالىپ جاتىر. جوبا مەملەكەتتىك باعدارلاما ارقىلى ىسكە قوسىلىپ، «قازاگروقارجى» ا ق ارقىلى قارجىلاندىرىلدى.

 
اقتوبەلىك كاسىپكەر تاۋلىگىنە 2 كەلى سالماق قوساتىن ءىرى قارا ءوسىرۋدىڭ جولىن ايتتى

باستى سوزدەر: ايماق, قوعام,
Нашли ошибку? Выделите её и нажмите CTRL+ENTER

پئكئر قالدئرؤ