قازاقستاندا 2019- جىلدان باستاپ 0-سىنىپ ەنگىزىلەدى - ساعادييەۆ
«2019 وقۋ جىلىنان 0 سىنىپتى ەنگىزۋ. ول 0+11، ياعني ون ەكى جىلدىق ءبىلىم بەرۋ جۇيەسىنە كوشۋگە ارنالعان. 0 سىنىپ بەس جاستاعى بالالاردىڭ ءجۇز پايىز ءبىرىنشى سىنىپقا دايىندالۋىنا جاعداي جاسايدى. الىپپەگە كەلسەك، 0 سىنىپقا ارنالعان بازالىق وقۋلىق جالپى دايىن. سىناقتان ءوتىپ وتىر. كەلەسى جىلى مۇعالىمدەردى دايىنداۋ جۇمىسى باستالادى»، - دەدى مينيستر.
سونىمەن قاتار ول بىلتىرعى جىلى باستالىپ كەتكەن جاڭارعان ءبىلىم بەرۋ مازمۇنىنا كەزەڭ- كەزەڭىمەن كوشۋ جۇرگىزىلەتىندىگىن ايتتى. وسى جىلى قوسىمشا 2, 5, 7 - سىنىپتار كوشەدى. كەلەسى ەكى جىلدا جاڭارعان مازمۇنعا بارلىق سىنىپ تولىقتاي كوشىپ بولادى.
مينيستر جاڭارعان مازمۇننىڭ ءمانى تەك ءبىلۋ ەمەس، سونىمەن قاتار ءبىلىمدى ومىردە قولدانا ءبىلۋ ەكەندىگىن اتاپ ءوتتى.
«بەس كۇندىك وقۋ اپتاسى نورمالارى بەكىتىلگەن. ءبىراق مەكتەپ جاعدايىنا جانە تيپىنە قاراي بارلىعىنا بىردەي ەنگىزۋ قيىن بولىپ تۇر. بۇگىنگى كۇنى بارلىق مەكتەپتەردىڭ 85 پايىزى تولىعىمەن، 1-11 - سىنىپقا دەيىن كوشتى. بىزدە 300-گە جۋىق ليتسەيلەر مەن گيمنازيالار بار، وندا ءبىر اپتادا قوسىمشا سەگىز ساباققا دەيىن بەرىلەدى. ولاردىڭ جوعارى سىنىپتارى بەس كۇندە بارلىعىن قامتي المايدى. الايدا گيمنازيا مەكتەبىنە بەرۋ اتا- انالاردىڭ ءوزىنىڭ قالاۋى. ساباقتاردىڭ ۇزاقتىعى 45-تەن 40 مينۋتقا قىسقارعانىنا قاراماستان ءۇش اۋىسىمدا وقيتىن مەكتەپتەرگە دە وتە قيىن بولىپ تۇر. بۇل ماسەلە تەك ءۇش اۋىسىمدى مەكتەپتەردىڭ قىسقارۋىمەن عانا شەشىلەدى»، - دەدى ە. ساعادييەۆ.
اۆتور: مارلان جيەمباي