پحەنچحان-2018: وليمپياداشىلار قانداي ستاديونداردا باق سىنايدى - فوتو
وندا الەمنىڭ 90 ەلىنەن 2500 دەن استام قاتىسۋشى باق سىناپ، سپورتتىڭ 15 تۇرىنەن 102 مەدال جيىنتىعىن ساراپقا سالادى.
وسى ورايدا ايتا كەتەيىك، حالىقارالىق وليمپيادا كوميتەتىنىڭ بۇل دودانى وڭتۇستىك كورەياعا سەنىپ تاپسىرۋىنىڭ باستى سەبەبىنىڭ ءبىرى - سپورتتىق نىسانداردىڭ ءبىر-بىرىنە جاقىن ورنالاسۋى بولعان.
وليمپياداشىلار ءبىر ستاديوننان ەكىنشى سپورت الاڭىنا جەتۋ ءۇشىن بار بولعانى جارتى ساعات ۋاقىت جۇمسايتىن كورىنەدى.
وليمپياداشىلار بولسا، الپەنسيا، ەنپحەن، فەنيكس-پارك تاۋ-شاڭعى كۋرورتتارىنداعى جانە كاننىن قالاسىنداعى قوناق ۇيلەرگە جايعاسادى. ال جارىستاردىڭ نەگىزگى ورتالىعى بولىپ الپەنسيا مەن كاننىن سانالادى.
وسى ورايدا، ХХIII قىسقى وليمپيادا ويىندارى قانداي سپورت كەشەندەرى مەن الاڭداردا وتەتىنىن وقىرمان نازارىنا ۇسىنۋدى ءجون كوردىك.
«الپەنسيا» بياتلون ورتالىعى (Alpensia Biathlon Centre)
بياتلون ورتالىعى الپەنسيا تاۋ-شاڭعى كۋرورتىنىڭ شەكاراسىندا ورىن تەپكەن. ورتالىق بياتلونشىلاردىڭ ءوزارا مىقتىنى انىقتايتىن الاڭىنا اينالادى.
كەشەن 1998-جىلى سالىنعان. 2007 جانە 2015-جىلدارى قايتا كۇردەلى جوندەۋدەن وتكەن. «الپەنسيا» بياتلون ورتالىعىندا بياتلوننان 2007/2008 جانە 2016/2017-جىلدارى الەم كۋبوگى وتسە، 2009-جىلى الەم بىرىنشىلىگىنىڭ جالاۋى جەلبىرەگەن.
«كاننىن وۆال» (Gangneung Oval)
«كاننىن وۆال» - كاننىن قالاسىنداعى كونكيمەن جۇگىرۋ سپورتىنا ارنالعان جابىق ستاديون. مۇندا اق وليمپيادا بارىسىندا كونكيمەن جۇگىرۋدەن جارىستار وتەدى.
ستاديوندا ستاندارتتى 400 مەترلىك ەكى جولاق بار. 8 مىڭ كورەرمەن ءبىر ۋاقىتتا جارىستى تاماشالاي الادى. كەشەن قۇنى 36,8 ميلليون دوللارعا باعالانعان.
«كاننىن وۆالدىڭ» قۇرىلىسى 2014-جىلدىڭ قازانىندا باستالىپ، 2017-جىلدىڭ قاڭتارىندا قولدانىسقا بەرىلگەن. ءتىپتى اراعا اي سالىپ كونكيمەن جۇگىرۋدەن الەم بىرىنشىلىگى اياسىندا جەكەلەي قاشىقتىقتار بويىنشا جارىستار دا وتكەن.
«الپەنسيا» شاڭعى ورتالىعى (Alpensia Cross-Country Centre)
«الپەنسيا» شاڭعى ورتالىعى الپەنسيا تاۋ-شاڭعى كۋرورتتى اۋماعىنىڭ شەكاراسىندا - وسى تەكتەس بياتلون ورتالىعىنىڭ جانىندا ورنالاسقان.
مۇندا شاڭعى جارىستارى مەن شاڭعى قوسسايىسىنان باق سىنايتىن سپورتشىلار سىنعا تۇسەدى.
سپورت الاڭىنىڭ ىرگەسى 1998-جىلى قالانعان. 2009-جىلى قايتا كۇردەلى جوندەۋدەن ءوتىپ، 2017-جىلى وليمپيادا الدىنداعى تەكسەرىس جارىستارى اياسىندا تاۋ شاڭعىسىنان الەم كۋبوگى كەزەڭى ءوتتى.
كاننىن مۇز ايدىنى (Gangneung Ice Arena)
بۇل ستاديوندا مانەرلەپ سىرعاناۋدان جانە شورت-ترەكتەن سايىستار وتەدى. ارەنانىڭ رەسمي اشىلۋى 2016-جىلدىڭ 14- جەلتوقسانىندا وتكەن.
قۇرىلىسىنا 85 ميلليون دوللار جۇمسالعان كەشەن، ءبىر ۋاقىتتا 12 مىڭ كورەرمەندى سىيدىرا الادى.
وليمپيادا الدىنداعى تەستىلىك جارىستار كەزىندە بيىل مانەرلەپ سىرعاناۋدان وڭتۇستىك كورەيا چەمپيوناتى، ءتورت قۇرلىق بىرىنشىلىگى جانە شورت-ترەكتەن الەم كۋبوگىنىڭ كەزەڭى ۇيىمداستىرىلدى.
«الپەنسيا» شانا-بوبسلەي ورتالىعى (Alpensia Sliding Centre)
«الپەنسيا» شانا-بوبسلەي ورتالىعى - بوبسلەي، شانا، سكەلەتون تراسساسى كەشەنى. ول پحەنچحان ۋەزىنە قاراستى دەكۆالمەن ەلدى مەكەنىندەگى الپەنسيا كۋرورتى ماڭىندا ورىن تەپكەن.
اتالعان ورتالىقتىڭ قۇرىلىسى 2013-جىلدىڭ جەلتوقسانىندا باستالعان. وسى جىلدىڭ سوڭىندا قولدانىسقا بەرىلەدى.
بۇل كەشەن 7 مىڭ كورەرمەنگە ارنالعان. قۇرىلىسقا جۇمسالعان شىعىن كولەمى 122 ميلليون دوللارعا تەڭ.
ەڭ ۇزىن تراسسانىڭ قاشىقتىعى - 2018 مەتر. سورە سىزىعى 940 مەتر بيىكتىكتە ورنالاسسا، مارە سىزىعى 800 مەتر بيىكتىكتە.
«الپەنسيا» تۇعىردان سەكىرۋ كەشەنى (Alpensia Ski Jumping Centre)
بۇل كەشەندە شاڭعىمەن تۇعىردان سەكىرۋدەن، سونداي-اق سنوۋبوردىڭ بيگ-ەير تۇرىنەن جانە شاڭعى قوسسايىسىنان جارىستار وتەدى.
كەشەن 2008-جىلى پايدالانۋعا بەرىلدى. الايدا، 2015-جىلدىڭ ساۋىرىندە قايتا جوندەۋ جاسالىپ، وليمپيادا اياسىندا حالىقارالىق ستاندارتتارعا سايكەستەندىرىلدى.
سىيىمدىلىعى - 13 مىڭ 500 ادام (11000 وتىراتىن ورىن جانە 2500 تۇرىپ تاماشالايتىن ورىن).
كەشەندە ك-98 جانە ك-125 تۇعىرلارى بار. ال اق وليمپيادادان سوڭ نىسان ۇلتتىق جاتتىعۋ جاساۋ ورتالىعى رەتىندە قولدانىلاتىن بولادى.
كاننىن حوككەي ورتالىعى (Gangneung Hockey Centre)
كاننىن قالاسىندا ورنالاسقان مۇز ايدىنى حوككەيدەن جارىستار وتەتىن نەگىزگى ارەنا. شاناداعى حوككەي سايىستارى دا وسىندا ۇيىمداستىرىلادى. ارەنانىڭ قۇرىلىسى 2014-جىلدىڭ ناۋرىزىندا باستالىپ، 2017-جىلدىڭ ناۋرىزىندا رەسمي تۇردە پايدالانۋعا بەرىلدى.
ەل بيلىگى عيمارات قۇرىلىسىنا 90 ميلليون دوللار جۇمساعان. سىيىمدىلىعى - 10 مىڭ ادام. 2017-جىلى بۇل ورتالىق «ا» توبىنىڭ ەكىنشى ديۆيزونىندا ايەلدەر مەن جاس وسپىرىمدەر اراسىندا الەم چەمپيوناتىن قابىلداپ ۇلگەردى.
كۆاندون ۋنيۆەرسيتەتىنىڭ سپورتتىق ارەناسى (Kwandong University Gymnasium)
بۇل كەشەن كۆاندون ۋنيۆەرسيتەتىنىڭ جانىندا ورنالاسقان. 2018-جىلعى وليمپيادا كەزىندە بۇل نىساندا كاننىن حوككەي ورتالىعىمەن قاتار حوككەي جارىستارى ۇيىمداستىرىلادى.
2014-جىلى نەگىزى قالانعان كەشەن 2017-جىلدىڭ اقپانىندا كەلۋشىلەرگە ەسىگىن ايقارا اشتى. سىيىمدىلىعى - 6 مىڭ كورەرمەن.
2017-جىلى كۆاندون ۋنيۆەرسيتەتى ارەناسى تەستىلىك جارىستار اياسىندا «ا» توبىنىڭ ەكىنشى ديۆيزونىندا ايەلدەر مەن جاس وسپىرىمدەر اراسىندا الەم چەمپيوناتىن قابىلدادى.
كاننىن كەرلين ورتالىعى (Gangneung Curling Centre)
بۇل كەشەن 2018-جىلعى قىسقى وليمپيادا ويىندارى بارىسىندا جابىق مۇز ايدىنىنا اينالىپ، كەرلينگ جارىستارىن قابىلايدى. ارەنا كاننىن شاھارىنداعى جاعالاۋدا بوي كوتەرگەن. بۇل ورتالىقتا 1999-جىلى قىسقى ازيا ويىندارى كەزىندە دە سايىستار، مانەرلەپ سىرعاناۋدان حالىقارالىق تۋرنيرلەر (2005، 2011)، شورت-ترەك (2007) پەن كەرلينگتەن الەم چەمپيوناتتارى (2009) وتكەن. 1998-جىلى قۇرىلىسى اياقتالعان نىسان 3,5 مىڭ كورەرمەنگە ارنالعان.
بوكۆانگ ەكستريم-ساياباعى (Bokwang Phoenix Park)
بۇل وليمپيادا كەشەنى ەكى بولىككە بولىنگەن. بىرىندە فريستايلدان، ەكىنشىسىندە سنوۋبوردتان جارىستار وتكىزىلەدى.
«فريستايل ورتالىق» 4 مىڭ ادامعا لايىقتالسا، سنوۋبورد جارىستارىن 6250 ادام تاماشالاي الادى.
ەنپحەن تاۋ-شاڭعى ورتالىعى (Yongpyong Alpine Centre)
ەنپحەن تاۋ-شاڭعى بازاسى وڭتۇستىك كورەيانىڭ قارى ەڭ كوپ جەرىنە سالىنعان. الەمنىڭ تالاي بەلدى سپورتشىسى باق سىناعان بۇل ورىندى جەرگىلىكتى تۇرعىندار ەلدىڭ مەككەسى سانايدى.
مۇندا ۇكىمەتتىك دەڭگەيدەگى كوپتەگەن ءىس-شارا، اتاپ ايتساق، 42 ەل قاتىسۋىمەن سلالوم، بياتلون، سپرينت، سنوۋبورد جارىستارى ۇيىمداستىرىلعان.
سونىمەن قاتار كورەيا رەسپۋبليكاسىنىڭ مادەنيەت، سپورت جانە تۋريزم مينيسترلىگىنىڭ ۇيىمداستىرۋىمەن قىسقى سپورت تۇرلەرى بويىنشا ۇلتتىق فەستيۆالدار وتكىزىلگەن.
تاۋ-شاڭعىسى بازاسىنىڭ قۇرىلىسىنا شەتەلدىك ينۆەستورلاردىڭ 84 ميلليون دوللار قارجىسى قۇيىلسا، وليمپيادا قارساڭىندا تاعى 50 ميلليون دوللار جۇمسالدى. سىيىمدىلىعى 18 مىڭ ادامدى قۇرايتىن كەشەندە تاۋ-شاڭعىسىنان تۋرنيرلەر وتەدى.
چونسون تاۋ-شاڭعى كەشەنى (Jeongseon Alpine Centre)
چونسون وليمپيادا ويىندارى كەزىندە ەكىنشى تاۋ-شاڭعى ورتالىعى بولىپ تابىلادى. بۇل كۋرورتتى قالاشىق پۋكپحەنمەن اۋماعىندا ورنالاسقان.
2018-جىلعى اق وليمپيادا اياسىندا مۇندا جىلدام سىرعاناۋ، سۋپەر-گيگانت جانە تاۋ-شاڭعى كومبيناتسياسىنان جارىستار ۇيىمداستارىلادى. وعان 18 مىڭ ادام سيادى.
ەرلەر اراسىندا جىلدام سىرعاناۋ 1433 مەترلىك بيىكتىكتە باستالىپ، ۇزاقتىعى 3,5 شاقىرىمعا جالعاسادى. ايەلدەر اراسىنداعى سىن 1380 مەتردەن باستالىپ، قاشىقتىعى 2,5 شاقىرىمعا جەتەدى. مارە سىزىعى 540 مەتر بيىكتىكتە ورنالاسقان.
دەگەنمەن، ەكولوگيانى قورعاۋ بويىنشا كەيبىر ۇيىمدار چونسوندا جارىستار وتكىزۋگە قارسى شىعۋدا. سەبەبى، مۇنداعى ورمان القاپتارى قورىق رەتىندە قورعاۋعا الىنعان.
پحەنچحان وليمپيادا ستاديونى (Pyeongchang Olympic Stadium)
مۇندا وليمپيادا ويىندارى كەزىندە ەكى اۋقىمدى ءىس-شارا ۇيىمداستىرىلادى. ونىڭ ءبىرى قىسقى ويىنداردىڭ اشىلۋى بولسا، ەكىنشىسى جابىلۋ سالتاناتتارى. سونىمەن قاتار مۇندا پاراليمپيادا ويىندارى وتەدى دەپ جوسپارلانعان. ۋاقىتشا جاسالعان ستاديون الپەنسيادان ەكى شاقىرىم جەردە ورنالاسقان. بۇل ستاديونعا 35 مىڭ كورەرمەن سيادى. سونداي-اق مۇندا جۇلدەگەرلەردى ماراپاتتاۋ ءراسىمى وتەدى.
اۆتور: كۇنسۇلتان وتارباي