گۇلبانۋ ءازىمحانوۆا «الەم ارۋى-2017» بايقاۋىنىڭ توپ-40 قاتارىنان كورىندى - فوتو
بۇل تۋرالى «قازاقستان ارۋى» بايقاۋىنىڭ ينستاگرامداعى پاراقشاسىندا حابارلاندى.
«الەم ارۋى-2017» بايقاۋىنىڭ رەسمي بولىگى بۇگىن، 18- قاراشا كۇنى استانا ۋاقىتىمەن 17.30 دا باستالادى.
گۇلبانۋ وزگە 39 قاتىسۋشىمەن بىرگە بايقاۋدىڭ باستى سىيلىعى - جەڭىمپاز ءتاجى ءۇشىن باق تالاستىراتىن بولادى.
«باستاپقىدا جەرەبە تارتۋ ارقىلى 118 قاتىسۋشى 20 توپقا ءبولىندى. ءارتىر توپتا اڭگىمەلەسۋ ءوتىپ، ونىڭ ناتيجەسى بويىنشا جانكۇيەرلەر موبيلدىك قوسىمشا ارقىلى وزىنە ۇناعان قاتىسۋشىعا داۋىس بەردى»، - دەلىنگەن الەۋمەتىك جەلىدەگى جازبادا.
بۇعان دەيىن حابارلاعانىمىزداي، «قازاقستان ارۋى-2017» اتانعان گۇلبانۋ ءازىمحانوۆا قازان ايىنىڭ سوڭىندا الەمدىك ءسان دوداسىنا قاتىسۋ ءۇشىن قىتايدىڭ سانيا قالاسىنا اتتاندى. بايقاۋ كەزەڭدەرىنىڭ بىرىندە «قازاقستان ارۋى» ارال تەڭىزىنىڭ ماسەلەلەرى مەن ونى شەشۋ جولدارى تۋرالى ەكولوگيالىق جوبانى تانىستىرادى.
بيىل «الەم ارۋىنىڭ» ۇيىمداستىرۋشىلارى فورماتتى ازداپ وزگەرتۋدى ۇيعارعان. بايقاۋ Head-to-Head Challenge ۇلگىسىندە وتكىزىلەدى. ۇيىمداستىرۋشىلاردىڭ پىكىرىنشە، الەۋمەتتىك جەلىلەر مەن ينتەربەلسەندىلىككە باسا نازار اۋدارىلادى.
فينالعا تەك 40 قاتىسۋشى عانا وتەدى، ولار ءارتۇرلى ءىس-شارالار مەن داۋىس بەرۋ ناتيجەلەرى بويىنشا انىقتالادى.
اۆتور: ميرا تولەندى قىزى