اۋداندىق سۋديالارعا قويىلاتىن جاڭا تالاپتار 1 -قىركۇيەكتە كۇشىنە ەنەدى
بۇل تۋرالى بۇگىن ەلىمىزدىڭ جوعارى سوت ورگانىنىڭ كەزەكتى وتىرىسىندا جوعارعى سوت ءتوراعاسى جاقىپ اسانوۆ ايتتى، دەپ حابارلايدى قازاقپارات.
ونىڭ ايتۋىنشا، جىل سايىن اۋداندىق، قالالىق سۋديالار ميلليوننان استام قىلمىستىق، ازاماتتىق، اكىمشىلىك ءىستى قارايدى. ءاربىر ءىس بويىنشا ءتيىستى شەشىم، ۇكىم، قاۋلى قابىلدانادى. مىسالى 2017 -جىلى اۋداندىق، قالالىق سۋديالار 1 ميلليون 200 مىڭ ءىس قاراپ، سونشاما شەشىم، ۇكىم، قاۋلى قابىلداعان.
«ال ەندى كوپ جاعدايدا وسىنداي شەشىمدەرمەن، ۇكىمدەرمەن كوبىسى كەلىسپەي جاتادى. وزدەرىنىڭ نارازىلىقتارىن جوعارعى سوت ساتىلارىنا بىلدىرەدى. ارينە، ونىڭ بىرنەشە سەبەبى بار. باستى سەبەپتىڭ ءبىرى - سوت شەشىمدەرىن، ۇكىمدەرىن تۇسىنبەۋ. ءبىز وسى جونىندە ءبىر اي بۇرىن ۇلكەن تالقىلاۋ جۇرگىزدىك. ازاماتتىق ىستەر بويىنشا قابىلدانعان سوت شەشىمدەرى قانداي بولۋى كەرەك؟ سول جونىندە بىرنەشە نورماتيۆتىك تالاپتار تۋرالى قاۋلى قابىلدادىق»، - دەدى جاقىپ اسانوۆ.
مىسالى، ونىڭ سوزىنە قاراعاندا، سوت شەشىمى مازمۇنى بويىنشا وڭاي، جەڭىل، تۇسىنىكتى تىلمەن جازىلسىن دەپ شەشىم قابىلدانعان. ارىز يەسىنىڭ ءار ءۋاجىن نومىرلەپ، سوت شەشىمىندە ولارعا جاۋاپ بەرۋ دە مىندەتتەلگەن.
«سونىمەن قاتار ءبىزدىڭ زاڭ تەرميندەرىمىز كوپ. نەشە ءتۇرلى كاسىبي تەرميندەر بار. ونى قاراپايىم ادام تۇسىنە بەرمەيدى. ءبىراق ونى سوت شەشىمىندە پايدالانۋعا مىندەتتىمىز. ءبىراق، ونى پايدالانۋ بارىسىندا قاراپايىم تىلگە اۋدارۋ تالاپ ەتىلەدى»، - دەدى ول.
جوعارعى سوت ءتوراعاسىنىڭ ايتۋىنشا، ازاماتتىق ىستەر بويىنشا سۋديا شەشىمىنىڭ ناقتى قۇرىلىمى دا بولۋى كەرەك.
«قاراپ وتىرساق، شەشىمدەردىڭ كولەمى ۇلكەن. ءبىراق كەرەك نارسەنى ونىڭ ىشىنەن تابۋ كوپ جاعدايدا مۇمكىن ەمەس، وتە قيىن. سوندىقتان ءبىز قانداي شەشىم قابىلدادىق؟ ءبىز ءاربىر شەشىمنىڭ لوگيكالىق قۇرىلىمى بولۋى ءتيىس دەپ تالاپ قويدىق. شەشىمدەردە ابزاتس، ينتەرۆال جوق، كوپ جاعدايدا كىشكەنتاي شريفتپەن جازىلادى. ونى ادامدار تۇسىنبەيدى، وقي المايدى، كوزى اۋىرادى. سوندىقتان ءبىز تەحنيكالىق تالاپتى دا قويدىق. بۇل نورماتيۆتىك تالاپتار 2018 -جىلدىڭ 1 -قىركۇيەگىنەن باستاپ كۇشىنە ەنەدى»، - دەپ اتاپ ءوتتى جاقىپ اسانوۆ.
وسى رەتتە ول نورماتيۆتىك تالاپتاردى ەنگىزۋ مەرزىمىنىڭ نەلىكتەن 4,5 ايعا شەگەرىلىپ وتىرعاندىعىن ءتۇسىندىرىپ ءوتتى.
«وسى ۋاقىتتا بىزگە اۋداندىق، قالالىق سۋديالاردى ءتۇسىندىرۋ ادىستەمەلەرىنە، شەشىمدى قالاي جازۋ، قالاي سويلەۋ كەرەكتىگىنە، شەشەندىككە ۇيرەتۋىمىز كەرەك»، - دەدى جوعارعى سوت ءتوراعاسى.