بۋرابايعا جىلىنا 1 ميلليونعا جۋىق ادام كەلەدى - مىرزالين
و ك ق- دا اقمولا وبلىسىنىڭ الەۋمەتتىك-ەكونوميكالىق دامۋى تاقىرىبىندا وتكەن باسپا ءسوز ءماسليحاتىندا مالىك مىرزالين ءوزى باسقاراتىن ايماق ءۇشىن باسىم باعىتتاردىڭ ءبىرى تۋريزم ەكەنىن اتاپ ءوتتى.
ونىڭ ايتۋىنا قاراعاندا، شۋچە-بۋراباي كۋرورتتىق كەشەنىنە جىلىنا شامامەن 1 ميلليون ادام كەلەدى. ونىڭ ىشىندە %30 ءى شەتەلدىكتەر.
«ەلباسى نۇرسۇلتان نازاربايەۆتىڭ ءوزى بۋرابايعا الەمدىك دەڭگەيدەگى كۋرورتتى جاساۋ جۇمىسىنا كوپ كوڭىل ءبولىپ كەلەدى. «ەكسپو-2017» حالىقارالىق كورمەسى ءبىزدىڭ ءوڭىرىمىزدىڭ تۋريستىك الەۋەتىن دامىتۋدا ماڭىزدى ءرول اتقارعانىن ايتا كەتەيىن. 100 دەن استام ەل قاتىسقان كورمەنىڭ ارقاسىندا بۋرابايعا كەلۋشىلەردىڭ سانى ارتتى»، - دەيدى ايماق باسشىسى.
مالىك مىرزالين ءوز سوزىندە بيىلعى جىلدىڭ ءبىرىنشى جارتىجىلدىعىندا اقمولا وبلىسىندا تۋريستەردى ورنالاستىرۋ بويىنشا قىزمەت كورسەتۋ تۇرعىسىنان 2,2 ميلليارد تەڭگەنىڭ قىزمەتى كورسەتىلگەنىن جەتكىزدى.
«ەندىگى مىندەتىمىز - وڭىرگە ءبىر مارتە كەلگەن ءتۋريستى قايتا-قايتىپ كەلگىسى كەلىپ تۇراتىنداي جاعداي جاساۋ. وسى ماقساتتا كۋرورتتىق ايماقتاردىڭ تارتىمدىلىعىن ارتتىرۋ بويىنشا جۇمىستار جۇرگىزىلۋدە. شۋچە-بۋراباي كۋرورتتىق ايماعىنىڭ ينفراقۇرىلىمىن ودان ارى دامىتۋ ءۇشىن قۇنى 61,3 ميلليارد تەڭگەلىك 34 جوبا جوسپاردىڭ III كەزەڭى شەڭبەرىندە جۇزەگە اسىرىلادى. قۇجات بۇگىنگى تاڭدا ۇكىمەتپەن بەكىتىلدى»، - دەيدى ول.
ءوڭىر باسشىسى سونىمەن بىرگە، اقمولا وڭىرىندە تۋريستىك اقپاراتتىق ورتالىق قۇرىلعانىن اتاپ ءوتتى. ايماق باسشىلىعى الداعى ۋاقىتتا بۋراباي كۋرورتىنىڭ جىل بويى تۋريستەردى قابىلداۋى بويىنشا جۇمىستاردى قولعا الماق.
«بۇگىنگى كۇنى ورتالىق كوممۋنيكاتسيالار قىزمەتىنىڭ پلاتفورماسىن پايدالانا وتىرىپ، مەن اقمولا وبلىسىنىڭ تۋريستىك الەۋەتىن ناسيحاتتايتىن ب ا ق وكىلدەرى اراسىندا بايقاۋ جاريالايمىن. بايقاۋ بەس نوميناتسيا بويىنشا وتەدى. بايقاۋدىڭ جەڭىمپازىنا 500 مىڭ تەڭگە، ەكىنشى ورىنعا 300 مىڭ تەڭگە جانە ءۇشىنشى ورىن ءۇشىن 200 مىڭ تەڭگە كولەمىندە سىيلىق تاپسىرىلماق. بارلىعىن وسى بايقاۋعا قاتىسۋعا شاقىرامىن!»، - دەپ ءتۇيدى مالىك مىرزالين.
بايقاۋ «ۇزدىك تەلەباعدارلاما»، «باسىلىمداعى ۇزدىك ماقالا»، «ۇزدىك راديوباعدارلاما»، «ۇزدىك ينتەرنەت جاريالانىم» بويىنشا جۇمىستار قابىلدانادى. بايقاۋدىڭ قورىتىندىسى كەلەسى جىلى «تۋريزم» كۇنىنە وراي جاريالانادى.