قوستانايدا 19 ءتارتىپ ساقشىسى پارامەن ۇستالدى

قوستاناي. قازاقپارات - قوستاناي وبلىسىندا ءوز لاۋازىمىن اسىرا پايدالانىپ، پارا الۋ ماسەلەلەرى جول كولىك وقيعالارىندا ءجيى كەزدەسەدى.

بۇل تۋرالى مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگىنىڭ وبلىستىق دەپارتامەنتى باسشىسى ەرلان سالىقبايەۆ ءمالىم ەتتى، دەپ حابارلايدى قازاقپارات ءتىلشىسى.

ەلىمىزدەگى مەملەكەتتىك ساياساتتىڭ باستى باعىتتارىنىڭ ءبىرى - جەمقورلىقپەن كۇرەس. وسى تاقىرىپ بويىنشا وتكەن بۇگىنگى جيىنعا مەملەكەتتىك قىزمەتتەگى لاۋازىمدى تۇلعالار مەن ىشكى ىستەر بولىمدەرىنىڭ قىزمەتكەرلەرى قاتىستى.

«ءبىزدىڭ دەپارتامەنت ماماندارى ءار توقسان سايىن حالىق اراسىندا مونيتورينگ جۇرگىزەدى. قولدا بار دەرەكتەرگە سۇيەنسەك، بۇگىندەرى ىشكى ىستەر ءبولىمى قىزمەتكەرلەرى اراسىندا جەمقورلىق فاكتىلەرى كوپ كەزدەسەدى»، - دەدى ەرلان سالىقبايەۆ.

جيىندا ايتىلعانداي، جىل باسىنان بەرى پارا العان 19 ءتارتىپ ساقشىسى جاۋاپقا تارتىلعان. ونىڭ 15 نىڭ ءىسى سوتتا قارالىپ، 8 ى باس بوستاندىعىنان ايىرىلدى.

دەگەنمەن، جەرگىلىكتى تۇرعىندار اراسىندا جۇرگىزىلگەن مونيتورينگ وڭىردەگى جەمقورلىق فاكتىسىنىڭ وتكەن جىلمەن سالىستىرعاندا 36 پايىزعا ازايعانىن كورسەتىپ وتىر. قوعام دەرتىنىڭ الدىن الۋ ماقساتىندا ۇيىمداستىرىلعان وسىنداي شارالار وڭ ناتيجە بەرۋى ءتيىس دەيدى دەپارتامەنت باسشىسى.