استانادا 11 مىڭ 700 شەتەلدىك ازاماتقا ۆاكانسيا بار

استانا. قازاقپارات - قازاقستاندا شەتەل ازاماتتارىن جۇمىسقا تارتۋعا بەلگىلى ءبىر مولشەردە كۆوتا بولىنەدى.

استانادا شەتەلدىكتەرگە سۇرانىس 11 مىڭ 700 ادامدى قۇرايدى.

بۇل تۋرالى قالالىق جۇمىسپەن قامتۋ، ەڭبەك جانە الەۋمەتتىك قورعاۋ باسقارماسىنىڭ باسشىسى ەرمەك وسپانوۆ ءماسليحاتتىڭ كەزەكتەن تىس سەسسياسىندا ايتتى، دەپ حابارلايدى ەلوردا ينفو.

ەرمەك وسپانوۆتىڭ ايتۋىنشا، شەتەلدىك جۇمىس كۇشى بىلىمدىلىك دەڭگەيىن قوسا العاندا، جالپى ءتورت ساناتقا بولىنەدى. شەتەلدىكتەردى جۇمىسقا تارتۋعا رۇقسات بەرەتىن ارنايى كوميسسيا قۇرىلعان.

ونىڭ قۇرامىنا قالالىق ءماسليحاتتان دەپۋتات گۇلنار دانبايەۆا ەنگەن.

«كۆوتا مەن كوميسسيا نە ءۇشىن كەرەك؟ ەڭ الدىمەن، شەتەلدىكتەردىڭ جۇمىسقا تارتۋ ۇدەرىسىن باقىلاپ وتىرۋ، بەلگىلەنگەن مولشەردەن اسىرماۋ ءۇشىن قاجەت. ەكىنشىدەن، ەڭبەك نارىعىمىزدى قورعاۋ ءۇشىن كەرەك. ءوزىمىزدىڭ ەل ازاماتتارىن جۇمىسپەن قامتۋعا باسىمدىق بەرىپ وتىرمىز. ال قازىر شامامەن العاندا 2500 سونداي ادام جۇمىسسىز رەتىندە تىركەۋدە تۇر. شەتەلدىكتەرگە جۇمىسقا رۇقسات بەرگەندە دە بارىنەن بۇرىن ءبىزدىڭ مامانداردى ۇيرەتە الاتىنىنا نازار اۋدارامىز»، - دەدى ەرمەك وسپانوۆ.

وسىدان بەس جىل بۇرىن ق ر ىشكى ىستەر مينيسترلىگى كوشى-قون كوميتەتىنىڭ ۇسىنىسىمەن استانادا ورالمانداردى بەيىمدەۋ ماسەلەسىن شەشەتىن ۆەدومستۆوارالىق كوميسسيا قۇرىلدى.

الايدا قازىرگى تاڭدا اتالمىش ورگانعا ءتۇسىپ جاتقان وتىنىشتەر جوق. سول سەبەپتەن كوميسسيا جۇمىسسىز وتىر.

ورالمانداردى بەيىمدەۋ ىسىمەن قالالىق جۇمىسپەن قامتۋ، ەڭبەك جانە الەۋمەتتىك قورعاۋ باسقارماسى اينالىسۋدا. سەسسيا بارىسىندا جوعارىداعى كوميسسيا جۇمىسىن توقتاتۋ ماسەلەسى قارالىپ، دەپۋتاتتار بۇل شەشىمدى ءبىراۋىزدان قولدادى.