14:54, 21 - ءساۋىر 2018 | GMT +6
استاناداعى سەنبىلىك: قالا اۋماعىنا 10 مىڭعا جۋىق اعاش وتىرعىزىلادى
استانا. قازاقپارات - «استانا - تازا جانە قاۋىپسىز قالا» جالپىقالالىق ناۋقانى اياسىندا 10 مىڭعا جۋىق اعاش وتىرعىزىلادى، دەپ حابارلايدى قازاقپارات ءتىلشىسى.
بۇل تۋرالى استانا قالاسى اكىمىنىڭ ورىنباسارى قوسمان ايتمۇحامەتوۆ قالالىق سەنبىلىكتە ءمالىم ەتتى.
«بۇگىن تاڭنان بەرى قالانى ارالاپ ءجۇرمىز، بارلىق كوشەلەردە، ساياباقتاردا تۇرعىندار سەنبىلىك جاساپ جاتىر. بۇل ءبىزدى قۋانتادى. بۇگىن 150 مىڭعا جۋىق قالا تۇرعىنى سەنبىلىككە شىعادى دەپ جوسپارلاپ وتىرمىز» ، - دەدى قوسمان ايتمۇحامەتوۆ.
سونىمەن بىرگە، اكىمدىك وكىلى قالا اۋماعىندا 10 مىڭعا جۋىق اعاش كوشەتى وتىرعىزىلاتىنىن حابارلادى.
«بارلىق كوشەتتەر ءوزىمىزدىڭ ءتالىمباقتان الىندى. بۇگىن ىلعال توپىراق جۇمىستى ءسال قيىنداتىپ تۇر. اعاش وتىرعىزعاندا توپىراقتى نىعىزداۋ كەرەك. دىمقىل توپىراقتى نىعىزداۋ قيىنعا تۇسەدى. ايتسە دە، بۇگىن بارلىق اعاشتىڭ دۇرىس وتىرعىزىلعانىن مۇقيات قاداعالايمىز» ، - دەيدى ق. ايتمۇحامەتوۆ.
