از ۇيىقتاپ، از تاماق ءىشۋ كەرەك: 105 جاستاعى دارىگەر ۇزاق جاساۋدىڭ قۇپياسىن اشتى

None
None
 استانا. قازاقپارات - جاپونيالىق دارىگەر شيگەاكي حينوحارا 2017 -جىلدىڭ 18 - شىلدەسى 105 جاسىندا قايتىس بولدى.

قاريا ءومىرىنىڭ سوڭعى كۇندەرىنە دەيىن توكيوداعى حالىقارالىق قاسيەتتى لۋكا اۋرۋحاناسىن باسقارىپ، ناۋقاستاردى ەمدەگەن. تاجىريبەلى ماماننىڭ قابىلداۋىنا ناۋقاستار 5 اي بۇرىن جازىلعان، دەپ حابارلايدى Baq.kz اقپارات اگەنتتىگى gubdaily.ru باسىلىمىنا سىلتەمە جاساپ.

ءولىم اۋزىندا جاتقان دارىگەر ۇزاق ءارى باقىتتى ءومىر ءسۇرۋدىڭ قۇپياسىن بولىسكەن ەكەن.

كوڭىل كوتەرىڭىز!

دارىگەردىڭ پىكىرىنشە، ۇيقى مەن تاماققا قاراعاندا، كوتەرىڭكى كوڭىل- كۇيدىڭ ادامعا بەرەر پايداسى مول.

«ادام كۇش- قۋاتتى تاماقتان نەمەسە ۇيقىدان ەمەس، قۋانىشتى ساتتەردەن الادى. بالا كۇنىمىزدە ويىندى بارىنەن ارتىق كورگەن كۇندەرىمىز ەستەرىڭىزدە مە؟ ەرەسەكتەردە دە ءدال سولاي. ءتانىڭىزدى تاماقتانۋ ءتارتىبى مەن ۇيقىمەن قيناۋدىڭ قاجەتى جوق» ، - دەيدى حينوحارا.

از تاماق ءىشىڭىز

جاپونيالىقتار تاماقتى تالعاپ جەۋدىڭ ارقاسىندا ۇزاق ءومىر سۇرەدى. تاڭعى اسقا ءبىر شىنى اياق كوفە، ءسۇت، اپەلسين شىرىنىن جانە ءزايتۇن مايىن تۇتىنادى. تۇسكى استى ىشپەسەڭىز دە بولادى. كەيدە تاماققا قاراعاندا، پايدالى ءىس ارتىق. مامان كەشكى اسقا كوكونىستەر، كۇرىش جانە بالىق جەۋگە كەڭەس بەرەدى. ال كۇندەلىكتى جەيتىن ەتتىڭ مولشەرىن ەكى ەسە قىسقارتقان ءجون. شامامەن ءبىر اپتاعا 200 گرامم ەت جەسەڭىز جەتكىلىكتى.

الدىن الا جوسپارلاڭىز

شيگەاكي حينوحارا بولاشاققا باعىتتالعان جوسپارلاردى مىندەتتى تۇردە قاعاز بەتىنە ءتۇسىرىپ وتىرۋعا كەڭەس بەرەدى. سەبەبى، ادام ويى ەرەكشە كۇشكە يە. مۇنىمەن قاتار، بولاشاعى تۋرالى كوپ ويلاناتىن ادامنىڭ وتكەن كۇندەردەگى وكىنىشتى ساتتەردى ەسكە الۋعا ۋاقىتى بولمايدى.

ءبىلىمىڭىزدى ءبولىسىڭىز

بىلگەن پايدالى اقپاراتىڭىزدى بولىسكەندە تۇرعان ەشنارسە جوق. دارىگەر جىلىنا كەم دەگەندە 150 ءدارىس وتكىزگەن ەكەن. ءار ءدارىس ءبىر جارىم ساعاتقا سوزىلعان. بارلىعىن دەرلىك ورنىنان تىك تۇرىپ جۇرگىزگەن.

سىني پىكىر ايتا ءبىلىڭىز

«دارىگەر سىزگە بەلگىلى ءبىر اناليز تاپسىرۋعا نەمەسە وتا جاساتۋعا كەڭەس بەرسە، «وسىلاردى تۋعان بالالارىڭىز بەن تۋىسقاندارىڭىزعا تاعايىندايتىن با ەدىڭىز؟ » دەپ سۇراڭىز. ويتكەنى، كەي جاعدايدا دارىگەرلەردىڭ ەمى كەرى اسەرىن تيگىزۋى مۇمكىن. كەيدە بىلىكتى دارىگەرلەرگە قاراعاندا، سۇيىكتى اۋەن مەن جانۋارلار جاقسى كومەكتەسەدى.

 

ءوزىڭىزدى اياماڭىز!

فيزيكالىق جاتتىعۋلاردىڭ ادام اعزاسىنا پايداسى مول. دەسە دە، سپورتپەن شىنىعۋ ءۇشىن مىندەتتى تۇردە جاتتىعۋ زالىنا بارۋدىڭ قاجەتى جوق. ورنىنا جاياۋ ءجۇرىپ، ۆەلوسيپەد ايداۋىڭىزعا بولادى. 105 جاستاعى حينوحارا ەكى باسپالداقتى قاتار اتتاپ، بۇلشىق ەتتەرىنىڭ جۇمىسىن جاقسارتقان.

وقىڭىز!

كەيدە كىتاپتار ادامدارعا ەرەكشە شابىت سىيلايدى. دارىگەر روبەرت براۋنينگتىڭ «اببات فوگلەر» پوەماسىن ءسۇيىپ وقىعان. «ونەردە دە، ومىردە دە الدىمىزعا ۇلكەن ماقساتتار قويا ءبىلۋىمىز قاجەت. ءتىپتى، شەڭبەر سىزساڭىز دا، ونىڭ كولەمى ۇلكەن بولسىن. باستاپقىدا ءبىز بۇل شەڭبەردىڭ تەك جارتىسىن كورۋىمىز ءتيىس» ، - دەيدى دارىگەر.

وزىڭىزگە قايعى سىيلاعان ساتتەردى ەسكە الۋدىڭ قاجەتى جوق

قايعى- قاسىرەتتەن ارىلعىڭىز كەلسە، نازارىڭىزدى باسقا ارناعا بۇرىڭىز. قىزىقتى بىرنارسە تۋرالى ويلاعاندا، ءتانىڭىز بەن جانىڭىزدىڭ اۋىرعانىن ۇمىتىپ كەتەسىز. دارىگەر زاماناۋي اۋرۋحانالاردا بي، مۋزىكا جانە جانۋارلاردىڭ كوپ بولۋى كەرەكتىگىن ايتادى. مۇنداي ەم ءتۇرى دارىدەن دە ارتىق كومەكتەسەدى.

قۇندىلىقتارىڭىزدى قايتا قاراپ شىعىڭىز

قازىرگى زاماندا كوپتەگەن ادام اقشانى رۋحاني بايلىقتان ارتىق كورەدى. ماحاببات، قايىرىمدىلىق، قامقورلىق سىندى يگى قاسيەتتەر تۋرالى مۇلدەم ويلاعىلارى كەلمەيدى. «كىمنىڭ قاي كۇنى ولەتىنىن ەشكىم بىلمەيدى. ال ماتەريالدىق بايلىقتى وزىڭىزبەن بىرگە الا كەتپەيتىنىڭىز انىق» ، - دەيدى ول.

وزىڭىزگە ۇلگى بولۋعا لايىق تۇلعا تابىڭىز

جاپونيالىقتىڭ ايتۋىنشا، ءار ادامنىڭ ۇلگى تۇتار تۇلعاسى بولۋى ءتيىس. مۇنىمەن قاتار، ءاردايىم ۇستازدان وزۋعا تىرىسۋ قاجەت. حينوحارانىڭ ۇلگى تۇتارلىق ادامى اكەسى بولعان.

«قينالعان ساتتە ءوزىم ۇلگى تۇتاتىن ادامدار مەنىڭ ورنىمدا بولسا نە ىستەيتىن ەدى؟ » دەپ ويلايمىن. ءسىز دە سولاي جاساڭىز» ، - دەيدى دارىگەر.

ءلاززات الىڭىز!

«ۇزاق ءومىر سۇرۋدەن اسقان باقىت جوق شىعار. بارلىقتارىڭىزدى ومىرلەرىڭىزدىڭ ءار ءساتىن باعالاۋعا شاقىراتىن ەدىم. قۋانىشىڭىزبەن بولىسكەندە عانا باقىتقا كەنەلەسىز» ، - دەيدى شيگەاكي حينوحارا.

 

 

 

سوڭعى جاڭالىقتار