دانيال احمەتوۆ سۋ تاسقىنى تۋرالى: مۇزعا كەتكەن تروتيلمەن 1,5 مىڭ تانكىنى جارۋعا بولاتىن ەدى

استانا. قازاقپارات - شىعىس قازاقستان وبلىسىنىڭ اكىمى دانيال احمەتوۆ سۋ تاسقىنىنا كەتكەن شىعىنداردى جاريالادى، دەپ حابارلايدى قازاقپارات ءتىلشىسى.

«زىريان، گلۋبوكوە جانە اياگوز اۋداندارىندا بولعان سۋ تاسقىنى سوڭعى 50 جىلدا العاش رەت بولىپ وتىر. بۇقتىرما وزەنىندەگى مۇزدىڭ قالىڭدىعى ەكى مەتردەن استى. ونى جارۋعا ءبىراز كۇش كەتتى. سودان بىرنەشە ساعاتتىڭ ىشىندە سۋدىڭ دەڭگەيى ەكى جارىم مەترگە تومەندەدى. ول مالەيەۆكا كەنتىندەگى جاعدايعا قاتىستى. ايتپاقشى، مۇزدى جارۋعا 17 توننا تروتيلدى جۇمسادىق. ونىڭ قانشالىقتى كوپ ەكەنىن ءتۇسىندىرۋ ءۇشىن ءبىر عانا مىسال كەلتىرەيىن، تانكتەرگە قارسى مينالاردا 11 كەلى تروتيل بولادى. ونىمەن 60 توننادان اساتىن تەمىردىڭ بىت- شىتىن شىعارۋعا بولادى»، - دەدى د. احمەتوۆ جۋرناليستەرگە بەرگەن سۇحباتىندا.

وبلىس اكىمى جارىلعىش زاتتاردى قولدانۋ كەزىندە سەمەيدە ءۇي شىنىلارىنىڭ سىنعانىن دا راستادى. بۇگىندە بارلىق تەرەزەلەردى قالپىنا كەلتىرىلگەن.

دانيال احمەتوۆتىڭ سوزىنە قاراعاندا، بۇگىندە شىعىس قازاقستان وبلىسىنا قوسىمشا 3,2 ميلليارد تەڭگە كەرەك. وسىعان بايلانىستى ءتيىستى قۇجاتتار ۇكىمەتكە جىبەرىلدى. «وسى ۋاقىتقا دەيىن ءبىز جەرگىلىكتى بيۋدجەتتەن شامامەن 500 ميلليون تەڭگەدەن استام قارجى جۇمسادىق. 172 ءۇيدى جوندەپ جاتىرمىز. 34 ءۇي جوندەۋگە كەلمەيدى. قازىر ونى ساتىپ الدىق. سوسىن 500 ءۇيدىڭ جوبالىق- سمەتالىق قۇجاتتارىن وتكىزدىك»، - دە اتاپ كورسەتتى د. احمەتوۆ.

اۆتور: ارمان اسقاروۆ